Zgjedhjet në komunat veriore mund të mbahen vetëm pasi të vendoset rendi dhe ligji. Kështu është shprehur kryeministri i Kosovës, Albin Kurti në një intervistë të dhënë për “France 24”.
Sipas tij, pa ligj nuk mund të ketë zgjedhje të lira dhe demokratike. Duke e konsideruar procesin e zgjedhjes së kryetarëve të komunave në veri si legjitim, kryeministri Albin Kurti thekson se Kosova është vendi më demokratik në Ballkanin Perëndimor.
Më tej, ai ka kritikuar ndërhyrjen e Beogradit në veri, ndërsa mirëpriti zgjedhjet pasi “milicia fashiste të vihet para drejtësisë”.
“Ne kemi nevojë të vendosim rend dhe ligj, ky është insistimi im. Nuk dua dështim pas dështimi”, tha Kurti.
Kryeministri Kurti u takua më 5 qershor me dy emisarët e BE-së dhe SHBA-së, ku përsëriti gatishmërinë për zhvillimin e zgjedhjeve të parakohshme në veri, por pas sundimit të ligjit.
”Vetëm sundimi i ligjit mund t’i hap rrugë zgjedhjeve të parakohshme, të lira, demokratike e të ndershme. E tillë duhet të jetë edhe fushata parazgjedhore. Kandidatët dhe votuesit në zgjedhjet e reja duhet të garojnë e marrin pjesë pa frikë e kërcënime. Rendi dhe ligjshmëria sigurisht që do të zvogëlonin proporcionalisht edhe numrin e policëve në ndërtesat komunale në tri komunat veriore”, thuhej në njoftimin e zyrës së Kryeministrit Kurti.
Intervista e Kryeministrit të Kosovës Albin Kurti për “France 24”
