Ëmbëlsuesi aspartami (sheqer artificial), mund të klasifikohet nga agjencia e OBSH-së e specializuar në kërkimin e kancerit, IARC, si “kancerogjen”. Lajmi, sipas Reuters, do të zyrtarizohet më 14 korrik në revistën “Lancet Oncology”.
Aspartami është përdorur dhe përdoret nga miliona njerëz, pasi ai është i pranishëm në mbi 6.000 produkte, nga pijet joalkoolike te kosi me fruta dhe deri te shurupet e kollës.
Por pas 40 vitesh përdorimi, pritet ky vlerësim nga IARC, i cili së bashku me FAO-n do të duhet të rivlerësojnë dozën e sigurt për substancën.
Sistemi i klasifikimit të agjencisë së OBSH-së ka katër kategori. Grupi 1 janë substancat për të cilat ka prova të mjaftueshme të kancerogjenit; Substancat e përfshira në grupet 2A (mundësisht kancerogjene) dhe 2B (ndoshta kancerogjene) konsiderohen potencialisht të afta për të nxitur zhvillimin e tumoreve, por ka nivele të ndryshme fuqie, bazuar te provat shkencore të disponueshme.
Aspartami është përfshirë në kategorinë 2A.
Muajin e kaluar, OBSH këshilloi kundër përdorimit të disa ëmbëlsuesve, përfshirë aspartamin. Përdorimi i tyre, sipas OBSH-së, “nuk sjell ndonjë përfitim afatgjatë”, ndërsa mund të çojë në ”efekte anësore, si rritja e rrezikut të diabetit, sëmundjeve kardiovaskulare dhe vdekshmëria tek të rriturit”.
Kjo deklaratë e OBSH-së, ka ngjallur reagimin e menjëhershëm të kompanive në këtë sektor, ndërsa onkologët dhe nutricionistët bëjnë thirrje për kujdes. Nga ana e saj, Shoqata Ndërkombëtare e Ëmbëlsuesve deklaron se “ka shqetësime serioze për spekulimet paraprake” mbi opinionin e IARC.
Sipas tyre aspartami është një nga “më të studiuarit gjatë historisë, me mbi 90 agjenci në mbarë botën që i deklarojnë atë dhe ëmblsuesit e tjerë të listës së OBSH, të sigurta”.
a.q. / dita
