Laçi-Erzeni mbyllën javën e 32-të të Kategorisë Superiore. Sfida mes tyre u mbyll me barazimin 1-1, me skuadrat që morën nga një pikë, ndërsa duhet theksuar pikë shumë e vlefshme kjo për shijakasit. Ishin kurbinasit ata që gjetën të parët rrugën drejt rrjetës, duke marrë avantazhin në minutën e 33’ me Bibon, me pjesën e parë që u mbyll me rezultatin 1-0.
Megjithatë miqtë reaguan dhe në minutën e 59’, Patrick Nonato realizoi golin e barazimit për skuadrën e tij. Pas këtij takimi Laçi ngjitet në vend të katërt me 44 pikë, ndërsa Erzeni në vend të shtatë me 39 pikë, dy më shumë Kukësi i vendit të tetë, ose thënë ndryshe nga zona e rrezikut. Kjo javë regjistroi rezultatin surprizë të Tiranës që ra në Durrës me përmbysje 2-1 për bregdetarët dhe fitoren e Partizanit 3-1 ndaj Kukësit që zhytet në fund dhe që i afroi ‘të kuqtë’ 2 pikë larg kreut, duke rindezur Superligën. Bylis dhe Kastrioti mbeten në fund dhe drejt rënies direkt në të Parën, 4 javë nga fundi, kurse kuksianët kanë dhe shpresën e play-off, sepse mbajnë vendin e tetë, me distancë katër pikë nga rënia.
