Mediat spanjolle kanë publikuar pamjet nga shtëpia e Lionel Messit, teksa ky i fundit ndodhej këtë fundjavë në shtëpinë e tij në Barcelonë, që prej të shtunës. Në pamjet e publikuara, argjentinasi shfaqet me biçikletë teksa kthehet në shtëpinë e tij Castelldefels, një lagje jashtë kryeqytetit të Katalonjës. Jashtë shtëpisë së Messit ishte edhe një tifoz i Barcelonës i cili kishte veshur një fanellë të Argjentinës dhe i kërkonte yllit të PSG-së një autograf. Messi u përpoq ta mbante të fshehtë vizitën e tij në Barcelonë, por gazetarët spanjollë e bënë të pamundur. Leo u largua nga aeroporti El Prat përmes një dalje të fshehur, por Gerard Romero ishte në gjendje të konfirmonte mbërritjen e tij gjithsesi. Ndërkohë, raportet për rikthimin e mundshëm të argjentinasit në Barcelonë po intensifikohen. Zërat e fundit të konfirmuar edhe nga drejtuesit apo lojtarët, se po bëjnë gjithçka që ‘pleshti’ të rikthehet, kanë zhytur në delir tifozët katalanas ‘cule’. Programi sportiv “El Chiringuito” ka publikuar edhe pamje nga argjentinasi duke lëvizur me biçikletë afër banesës.
