Ministri i Jashtëm i Rusisë, Sergei Lavror ka mbërritur në Nju Jork ku do të marrë pjesë në Asamblenë e Përgjithshme të Kombeve të Bashkuara.
Ai do të vihet përballë liderit ukrainas, Volodymyr Zelenskyy dhe fokusi i diskutimeve do të jetë lufta. Pritet mes palëve të ketë edhe përplasje.
Mbrëmjen e kaluar, lideri ukrainas mbajti një fjalim në Asamblenë e Përgjithshme të OKB, ku u prit me ovacione nga të pranishmit.
Gjatë fjalimit, i cili u përqendrua shumë në rrezikun që Rusia paraqet për botën, ai argumentoi se sfidat e tjera të përbashkëta, si ndryshimi i klimës, mund të trajtohen siç duhet vetëm pasi Moskës t’i jetë treguar vendi.
“Ndërsa Rusia po e shtyn botën drejt luftës përfundimtare, Ukraina po bën gjithçka për të siguruar që pas agresionit rus askush në botë nuk do të guxojë të sulmojë asnjë komb”, u tha Zelenskyy liderëve botërorë që marrin pjesë në Asamblenë e Përgjithshme vjetore.
Ai theksoi gjithashtu se Rusia thjesht nuk ka “të drejtë të mbajë armë bërthamore”.
“Armatimi duhet të frenohet, krimet e luftës duhet të ndëshkohen, njerëzit e dëbuar duhet të kthehen në shtëpi dhe pushtuesi duhet të kthehet në tokën e tij. Duhet të jemi të bashkuar për t’ia dalë dhe do ta bëjmë!”, tha ai.
Ai gjithashtu akuzoi Moskën për “gjenocid” duke rrëmbyer fëmijë ukrainas. Më vonë, Zelenskyy dha një intervistë për CNN, ku shprehu nevojën e menjëhershme të Ukrainës për avionë luftarakë F-16.
Lideri ukrainas shprehu besimin se Rusia nuk do ta fitojë këtë luftë, teksa bëri ironi dhe me ish-presidentin amerikan Donald Trump.
j.l./ dita
