Këtë të dielë në 19 mars në Mal të Zi zhvillohen zgjedhjet presidenciale. Në garë janë 7 kandidatë mes tyre edhe presidenti aktual Milo Gjukanoviç. Në një komunikim me mediat Gjukanoviç tregoi arsyet pse zgjodhi të kandidojë serish.
“Kandidatura ime për president është shprehje e përgjegjësisë ndaj Malit të Zi, shprehje e shqetësimit për rrezikimin e arritjeve të zhvillimit të Malit të Zi modern, i cili është në probleme të mëdha. Në më pak se tre vjet, Mali i Zi ka bërë një rrugë të pabesueshme, nga një vend që u përshkrua si një oazë e demokracisë multietnike dhe një spirancë e stabilitetit në Ballkan, nga një vend që ishte lider në procesin e negociatave me BE-në, e deri te Mali i Zi që sot cilësohet si plagë kanceri eBallkanit dhe e Europës. Kësaj agonie duhet t’i jepet fund sa më parë dhe kjo është e mundur në zgjedhje. Është koha për njerëz seriozë dhe të përgjegjshëm“, tha Gjukanoviç.
Miodrag Lekiç, i ka njoftuar liderët e mazhorancës se ende nuk e ka shumicën e nevojshme për formimin e qeverisë së re, pasi i mungojnë tre vota. Po nga ana tjetër Dritan Abazoviç po tenton sërish të formojë një qeveri të re, në të cilën do të merrnin pjesë edhe FD dhe Demokratët, por për këtë nuk ka përkrahje të mjaftueshme, pasi deputetët e pakicave janë kundër.
Mali i zi mund të shkojë shpejt edhe në zgjedhje të parakohshme parlamentare të cilat mund të mbahen në fund të majit ose në fillim të qershorit nëse presidenti i Malit të Zi dhe Partia Demokratike e Socialistëve Milo Gjukanoviç vendos të shpërndajë Kuvendin.
Sipas mediave malazeze, një pjesë e ekipit ligjor të Gjukanoviçit ka propozuar që të shpërndajë parlamentin dhe të shpallë zgjedhje nëse nuk formohet qeveria e re deri të enjten.
Edhe Kandidatja e Partisë Socialdemokrate (SDP) për presidente të Malit të Zi, Draginja Vuksanoviç Stankoviç, tha se pret që presidenti aktual i vendit, Millo Gjukanoviç, të enjten të shpërndajë parlamentin dhe të thërrasë zgjedhjet e jashtëzakonshme parlamentare.
Mali i Zi Demokratik dhe Lëvizja Qytetare URA e drejtuar nga Dritan Abazoviç kanë rënë dakord për një aleancë që parasheh pjesëmarrje të përbashkëta në zgjedhjet e ardhshme.
Lëvizja Qytetare URA, në zgjedhjet presidenciale do të mbështesë kandidaturën e liderit demokrat Alekse Beçiç.
o.j/dita
