Rolando Maran e nis me humbje aventurën në stolin kuqezi. Kombëtarja shqiptare u mposht me rezultatin minimal 0-1 nga Izraeli në ndeshjen miqësore të zhvilluar në stadiumin “Air Albania”.
Momenti që vendosi fatin e këtij takimi erdhi në minutën e 73-të. Pas një kundërsulmi të shpejtë të miqve, Gloukh përfitoi nga hapësirat në mbrojtjen shqiptare dhe me një goditje diagonale mposhti Sherrin.
Oskar Glouk vendosi të provokonte tifozët e Shqipërisë gjatë festës. Menjëherë ishte Elseid Hysaj që i kërkoi llogari futbollistit të Izraelit. Të dy protagonistët e episodit në fjalë u ndëshkuan me karton të verdhë.
Në minutën e 82-të, Izraeli iu afrua golit të dytë, por Alen Sherri bëri edhe njëherë tjetër një pritje shpëtimtare. Rezultati nuk ndryshon deri në fund. Ndeshja u mbyll 0-1, në favor të Izraelit.
Pjesa e parë u mbyll në barazim pa gola, megjithëse Shqipëria pati mundësi të mira për të kaluar në avantazh. Rasti më i pastër erdhi në minutën e 10-të, kur Elseid Hysaj krosoi saktë nga krahu i djathtë për Ernest Muçin Mehmeti, i cili i vetëm përballë portës nuk arriti të koordinohej dhe e dërgoi topin mbi traversë.
Izraeli reagoi në minutën e 15-të me Gloukh, por tentativa e tij përfundoi jashtë kuadratit. Kristjan Asllani provoi dy herë nga distanca në minutat 18 dhe 22, pa mundur të gjejë portën kundërshtare. Mehmeti ishte sërish pranë golit në minutën e 29-të me një goditje të harkuar që kaloi pranë shtyllës, ndërsa Hoxha tentoi në minutën e 34-t, por pa sukses.
Në fundin e pjesës së parë, Armando Broja humbi një mundësi të mirë brenda zonës, duke mos arritur të finalizojë si duhet në minutën e 43-të.
Edhe pjesa e dytë nisi me ritëm. Ramadani provoi nga distanca në minutën e 54-të, ndërsa Izraeli u bë më këmbëngulës në sulm. Në minutën e 59-të, portieri Alen Sherri shpëtoi kuqezinjtë me një pritje vendimtare ndaj Solomon, i cili ishte i vetëm përballë portës.
Shqipëria reagoi me një aksion të rrezikshëm të Hoxhës në minutën e 67-të, kur një devijim i mbrojtjes izraelite për pak sa nuk përfundoi në autogol.
Vetëm një minutë më vonë pati tension në fushë, pasi autori i golit bëri gjeste drejt tifozëve në tribuna, duke sjellë reagimin e Elseid Hysajt dhe një përplasje mes lojtarëve.
Pavarësisht përpjekjeve në minutat e mbetura, Shqipëria nuk arriti të rikthehej në lojë dhe u detyrua të pranojë humbjen në testin e parë nën drejtimin e Rolando Maran. Një debutim jo i dëshiruar për teknikun italian, ndërsa kuqezinjtë do të kërkojnë reagimin në ndeshjet e ardhshme.
