Ndër grupet të cilët ndikuan në rënien e eksporteve për muajin nëntor ishin edhe bimët medicinale që patën një ndikim negativ. Sipërmarrësit e këtij sektori përllogarisin 40% rënie në eksporte gjatë 11 muajve të parë të vitit krahasuar me të nëjtën periudhë të 2022.
“Sot themi të mbështeten fermerët me rimbursimin e tvsh në llogarinë e tyre dhe ne të kemi mundësi të eksportojmë. 12 milionë euro të shpërndahen në mënyrë të ndershme të cilët janë të regjistruar me nipte industria jonë do të ecë përpara. Kjo vlerë sështë asgjë për buxhetin e shtetit,” shprehet Xhevit Hysenaj, sipërmarrës në fushën e bimëve medicinale.
Sipas të dhënave të INSTAT për 10 mujorin, eksportet e grupit “Farat vajore, bimët industriale apo medicinale, ushqimi për kafshët” ranë me 22% krahasuar me një vit më parë. Mbështetja e drejtpërdrejtë e fermerit në llogaritë e tyre do të rigjallëronte sektorin sipas sipërmarrësit Xhevit Hysenaj.
“Ne kemi kërkuar ngritjen e çmimeve në tregjet botërore, por e vështirë. Fuqia punëtore është e lirë në vendet e tjera. Jemi në një situatë të tillë që ose do ngremë çmimet në tregje botërore ose do ulim blerjet tek fermerët. Nëse bëjmë këtë të dytën, fermerët do lënë tokat pa punuar.”
Shkaktarë kryesor të situatës së eksporteve sipërmarrësit rendisin luhajtet në kursin e këmbimit.
“Bimët blihen 100% me lekë shqiptare dhe eksportohen në valutë. Kështu që kemi mbi 20% rënie.” Nëse kjo situatë do të jetë e njëjtë edhe për vitin 2024, shkurtimi i punonjësve do të jetë vendim i padiskutueshëm sipas sipërmarrësve të sektorit.
p.c. / dita
