Numri i të vdekurve nga tërmetet e javës së kaluar në Turqi dhe Siri ka shkuar në 37,457. Autoritetet turke kanë raportuar se 31,643 persona janë vrarë në vend. Sipas të dhënave nga Kombet e Bashkuara dhe qeveria siriane, më shumë se 5,814 njerëz kanë humbur jetën në Siri.
Autoritetet turke kanë arrestuar një numër ndërtuesish të pronave të fajësuar për shembjet e ndërtesave ndërsa zemërimi i publikut për reagimin ndaj tërmetit rritet.
Një 17-vjeçar u shpëtua pas 195 orësh, ndërsa një grua pas 175 orësh nën rrënoja, dy historitë e konsideruara mrekulli.
Mediat turke shkruajnë se 17-vjeçari Muhammed Enes u nxor nga rrënojat në Kahramanmaraş.
Pas 195 orëve nën rrënoja, u dëgjua një zhurmë në rrënojat e apartamenteve Seçkinler. Nën rrënoja ndodheshin nëna e tre motrat e Enes, të cilat nuk kishin mbijetuar. 17-vjeçari kishte humbur dhe babain e tij në një aksident 11 vite më parë.
Punëtorët në Turqi vazhdojnë përpjekjet e kërkimit.
Operacionet e shpëtimit kanë përfunduar në zonat e kontrolluara nga rebelët në veriperëndim të Sirisë, tha organizata vullnetare e Helmetave të Bardha. Përpjekjet për ndihmë atje janë ndërlikuar dhe nga lufta civile.
j.l./ dita
