Mbreti Charles qëndroi krah për krah me Presidentin gjerman teksa kujtoi viktimat nga bombardimet amerikane dhe britanike në Hamburg gjatë Luftës së Dytë Botërore, shkruan BBC.
Në ditën e tretë të vizitës së tij shtetërore, Mbreti vendosi një kurorë në rrënojat e kishës së Shën Nikolait, si simbol i pajtimit.
Kisha u ruajt si një përkujtim për sulmet e rënda ajrore të kryera nga forcat ajrore amerikane dhe britanike 80 vjet më parë.
Të enjten, Mbreti mbajti gjithashtu një fjalim mbi shërimin e plagëve të ndarjeve që shkaktoi lufta.
Gjatë shërbesës të së premtes, një kor këndoi dhe zhvilloi lexime në mbetjet e kishës së shekullit të 19-të.
Kjo përfshinte një referencë për “kujtimin e atyre që humbën jetën në bombardimet aleate të Hamburgut në 1943”.
Një ekspozitë në vend kujton se 34,000 njerëz vdiqën në një seri sulmesh ajrore në bombardimet intensive dhe stuhitë e zjarrit që pasuan në qytet në korrik 1943.
Kishte gjithashtu një përshkrim të të burgosurve nga një kamp përqendrimi nazist, të cilët u detyruan të kryenin operacionin e shpëtimit dhe pastrimit pas bastisjeve.
Mbreti Charles vendosi një kurorë të zezë dhe të kuqe me mbishkrimin “Në kujtim të përjetshëm” dhe bashkëshortja, Mbretëresha Camilla vendosi një trëndafil të bardhë në shkallët pranë tij.
Ata u shoqëruan nga presidenti gjerman Frank-Walter Steinmeier, në një vizitë shtetërore ku Mbreti ka kërkuar të njohë të kaluarën dhe të angazhohet për një partneritet më të fortë në të ardhmen.
Kisha pa çati ishte projektuar nga arkitekti anglez, George Gilbert Scott.
I njëjti arkitekt kishte projektuar Memorialin Albert në Londër, i ndërtuar në nder të paraardhësit gjerman të Mbretit, Princit Albert.
j.l./ dita