Gjykata e Lartë ka njoftuar se mbledhja e posaçme për zgjedhjen e anëtarit të ri të Gjykatës Kushtetuese do të zhvillohet më 30 shtator.
Në garë për këtë post janë tre kandidatë: Asim Vokshi, Naureda Llagami dhe Florian Ballhysa. Procesi i përzgjedhjes do të kryhet me votim nga gjyqtarët e Gjykatës së Lartë, dhe fitues do të shpallet kandidati që merr më shumë vota.
Anëtari i ri do të pasojë në këtë detyrë gjyqtaren Holta Zaçaj, mandati i së cilës ka përfunduar në muajin mars.
Sipas njoftimit të Gjykatës së Lartë, procesi ka nisur pas depozitimit më 23 shtator 2025 nga Këshilli i Emërimeve në Drejtësi të raportit dhe listës së renditjes së kandidatëve për vendin vakant. Ky vend ishte shpallur nga Gjykata e Lartë më 11 dhjetor 2024.
Mbledhja e posaçme do të thirret nga Kryetari i Gjykatës së Lartë, Sokol Sadushi, dhe do të zhvillohet në orën 09:00, në ambientet e institucionit.
j.l./ dita
