10 persona janë marrë në pyetje nga policia e Vlorës në lidhje me ngjarjen e ndodhur një ditë më parë, në lagjen “Hajro Cakërri”, ku Rei Mete qëlloi për vdekje me grushte biznesmenin e ndërtimit, Armando Meshau.
Personat në fjalë kanë qënë kryesisht dëshmitarë okularë më vendin e ngjarjes, të cilët kanë parë konfliktin, por edhe familjarë si të viktimës dhe autorit. Dëshmitarët në Polici kanë treguar rrjedhën e ngjarjes, konfliktin si nisi dhe si u zhvillua teksa familjarët kanë dëshmuar nëse kanë qenë në dijeni të konfliktit për një apartament.
I pyetur në Polici fill pas arrestimit, Rei Mete ka thënë se nuk ka patur motiv për ta vrarë, teksa shtoi se në qendrën e internetit janë takuar rastësisht. Sipas tij, të dy do të printonin disa dokumente.
Rei Mete ka pohuar se viktima, Armando Meshau, e ka sharë i pari dhe e ka goditur përpara se konflikti të përshkallëzohej.
Mete gjithashtu ka deklaruar se e ka goditur për vetëmbrojtje teksa pretendon se 55-vjecari e ka humbur jetën nga përplasja e kokës në tokë.
Sipas tij, vdekja e 55-vjecarit pretendohet të jetë aksidentale.
Në anën tjetër, burimet e policisë së Vlorës konfirmojnë se Rei Mete futej shpeshherë si sekser për pronat në Vlorë. Sipas tyre ai merrte përgjegjësi në emër të së ëmës, Nurihan Metes, e cila është anëtare e KLP-së.
Mete kërkonte që për lejet e pronave që jepeshin, apo zgjidhjen e marrveshjeve të mbante dhe ai përfitime. Në këtë rast është bërë një marrëveshje mes palëve për një pronë, për të cilën pas marrëveshjes, Armando Meshau e ka gjetur dakordësinë me palën e tretë.
Mete pretendonte se viktima duhet ‘ti jepte një apartament pavarësisht se nuk ishte ai personi që zgjidhi konfliktin.
Pamjet filmike të kamerave të sigurisë që janë sekuestruar dhe janë në dispozicion të policisë do të japin një version të saktë të ngjarjes. Në lidhje me pamjet filmike policia vijon të mbetet e rezervuar dhe nuk ka një version zyrtar mbi dinamikën e konfliktit.
j.l./ dita
