EULEX në Kosovë do të drejtohet nga Giovanni Pietro Barbano, i cili ditën e sotme ka nisur zyrtarisht detyrën e tij të re.
Pavarësisht situatës së tensionuar që ndodhet aktualisht ndërmejt Kosovës dhe Serbisë, Barbano ka deklaruar se është i vetëdijshëm për mandatin jetik të Misionit të BE-së për sundimin e ligjit në Kosovë, ku dhe ka shprehur bindjen se do të punojë me integritet dhe profesionalizëm për të ndikuar pozitivisht në terren.
“Ndjej një përgjegjësi të madhe gjersa marr sot detyrën si Shef i EULEX-it, një partner strategjik i Kosovës në fushën e sundimit të ligjit dhe sigurisë. Duke qenë plotësisht i vetëdijshëm për mandatin jetik të Misionit, unë do të punoj me integritet dhe profesionalizëm për të vazhduar moton e Misionit ‘Partneritet për drejtësi’, për të ndikuar pozitivisht në teren dhe për t’i avancuar synimet tona të përbashkëta për sundimin e ligjit në Kosovë”, tha Barbano.
Barbano është Gjeneralmajor i Karabinierisë së Italisë me më shumë se 40 vite përvojë në ligj dhe rend, aktivitete policore, dhe operacione të paqes.
Misioni i përgjithshëm i EULEX-it është të ndihmojë autoritetet e Kosovës në ndërtimin e institucioneve të qëndrueshme dhe të pavarura të sundimit të ligjit, me fokus në sektorët e policisë, gjyqësorit dhe doganave dhe përmes shtyllave të monitorimit dhe operacioneve.
Italiani Barbano do të zëvendësojë Lars-Gunnar Ëigemark. Mandati i tij si shef i EULEX-it në Kosovë do të zgjasë nga 26 qershor 2023 deri më 14 qershor 2025.
Vendimi për emërimin e Barbanos u mor nga shtetet në Komitetin Politik dhe Siguri (KPS).
Këshilli e zgjati mandatin e misionit deri më 14 qershor 2025 dhe, në përputhje me rishikimin e fundit strategjik të EULEX-it në Kosovë, vendosi që, përveç vazhdimit të përmbushjes së detyrave të tij, misioni do të ndihmojë autoritetet e zbatimit të ligjit të Kosovës në zhvillimin e kapacitetin e tyre për të shkëmbyer informacion me homologët rajonalë dhe ndërkombëtarë në fushën e ndihmës juridike dhe bashkëpunimit në çështjet penale.
p.k\dita
