Lionel Messi po prezantohet me petkun e më të madhit të historisë në futbollin e Shteteve të Bashkuara të Amerikës.
Që kur iu bashkua Inter Miamit në muajin korrik, shtatë herë fituesi i Topit të Artë e ka ndryshuar rrënjësisht këtë skuadër, me të cilën fitoi brenda një kohe të shkurtër Kupën e Ligës (shtatë fitore radhazi).
Inter Miami, me Messin në formacion, fitoi gjithashtu ndaj FC Cincinatit në US Open Cup e tani i ka ardhur radha një ndërmarrjeje jashtëzakonisht të vështirë në MLS (Inter Miami renditet në vendin e parafundit në Konferencën e Lindjes me vetëm 21 pikë, 11 pikë larg zonës play off).
Në ndeshjen ndaj New York Red Bulls, Messi hyri si zëvendësues në minutën e 60-të për të debutuar në sezonin e rregullt në MLS. Inter Miami po udhëhiqte 0-1 me gol të Gomez në minutën e 37-të.
Pak para se të mbyllej takimi (89’), ai u dhuroi tifozëve të pranishëm në stadium shfaqjen që atë po prisnin të shikonin.
Pas një kombinimi me Cremaschin, realizoi në mënyrën më të thjeshtë të mundshme golin e tij të parë në MLS dhe të 11-tin në total me fanellën e Inter Miamit.
Fitorja ndaj New York Red Bull është hapi i parë drejt katapultimit në play off. teksa Inter Miami me këtë fitore la vendin e fundit dhe u ngjit një më sipër, teksa ka edhe 2 takime të prapambetura në kampionat.
