Një tjetër krisje mes PSG dhe Leo Messit? Lamtumira në fund të sezonit tanimë duket gati e sigurt, teksa ende nuk kanë siguruar kampionatin, ku ndodhen 5 pikë avantazh nga Marseja, në po 5 ndeshje të mbetura. Teksa palët ndodhen në negociata dhe pak orë pas humbjes me Lorient në shtëpi, kampioni i botës fluturoi drejt Arabisë Saudite. Megjithëse thashethemet në media kanë shpërthyer për mungesën në stërvitjen e PSG të hënën, duke e artikuluar si mungesë disipline, arsyeja ishte e justifikuar. Messi kishte shtyrë dy herë udhëtimin për promovimin e Arabisë në aktivitete sociale dhe turistike atje, ndaj nuk kishte më datë tjetër bosh dhe do të shkonte dëm. Dy herët e para ishte sakrifikuar për hir të PSG-së. Por këtë herë skuadra kishte parashikuar dy ditë pushimi dhe plani ndryshoi pas humbjes me Lorient. Galtier u preu një nga ditët dhe i kërkoi në stërvitje, por Messi ndërkohë ishte ngritur në fluturim. “Zjarrin” e ka ndezur “L’Equipe”, gazeta armike e argjentinasit, por e vërteta duket se është që Messi tashmë do të largohet. Vetëm një ofertë e gëzueshme do e mbante edhe një vit më shumë në Paris dhe dështimi i planeve te Barcelona për shkak të financave. Dhe kështu argjentinasi ka zgjedhur të mos i anulojë impenjimet e tij në Arabi ku është një ndër ambasadorët e Federatës së Futbollit në Riyad, për të promovuar kandidaturën e tyre për Botërorin e 2030, çka ka irrituar drejtuesit në Paris. A do të largohet Messi në fund të sezonit? Do e tregojë vetëm koha…