Milani siguron pjesëmarrjen në Champions League një javë para përfundimit të Serisë A. Skuadrës kuqezi i mjaftonte vetëm një pikë për arritjen e këtij objektivi por, në fakt, fitoi tri në përplasjen e drejtpërdrejtë me Juventusin.
Sfida në “Allianz Stadium” të Torinos u vendos nga një gol fantastik me kokë i sulmuesit veteran, Oliver Giroud, që e dërgoi topin aty ku nuk mund ta arrinte portieri bardhezi. Një krosim i saktë i Calabria nga e djathta e sulmit u shfrytëzua në maksimum nga Giroud, që i vodhi kohën mbrojtësit kundërshtar, duke goditur saktë nga një distanca jo e afërt.
Ky episod i mjaftoi “Djallit”, që në minutat e fundit mendoi më shumë për të mos rrezikuar në prapavijë. Milani bëhet skuadra e katërt dhe e fundit që siguron pjesëmarrjen në Champions pas Napolit, Lazios dhe Interit.
