Shqipëria ka nisur konkretizimin e angazhimit të saj në misionin ndërkombëtar për ruajtjen e paqes në Gaza, duke ndërmarrë hapat e parë për dislokimin e personelit ushtarak.
Këshilli i Ministrave miratoi këtë të mërkurë projektligjin për angazhimin e Forcave të Armatosura në operacionin ushtarak të Forcës Ndërkombëtare të Stabilitetit, i cili parashikon që numri maksimal i personelit të Forcave të Armatosura që mund të marrë pjesë në mision të jetë 40 ushtarakë.
Sipas dokumentit, misioni i kontingjentit shqiptar do të përfshijë mbështetjen e operacioneve të sigurisë dhe stabilitetit, mbrojtjen e personelit, objekteve dhe infrastrukturës së misionit, mbështetjen e operacioneve humanitare, monitorimin dhe raportimin e situatës së sigurisë, si edhe detyra të tjera në përputhje me mandatin e misionit, në kuadër të Bordit të Paqes.
Projektligji parashikon gjithashtu që ushtarakët pjesëmarrës, përveç pagës mujore, të përfitojnë dieta për ditët e qëndrimit në operacion, në masën që do të përcaktohet me vendim të Këshillit të Ministrave.
Më herët gjatë ditës, ministri i Mbrojtjes, Ermal Nufi, bëri të ditur se përfaqësia shqiptare do të nisë fillimisht me katër oficerë shtabi.
Pas mbledhjes së qeverisë, Nufi tha se projekt-akti do t’i dërgohet Kuvendit për miratim dhe se vendimi është në përputhje me mandatin e Këshillit të Sigurimit të Kombeve të Bashkuara dhe të Forcës Ndërkombëtare Stabilizuese.
“Republika e Shqipërisë do të ketë një përfaqësi në Gaza duke filluar fillimisht me katër oficerë shtabi. Me vajtjen e këtyre katër oficerëve të shtabit në Forcën Ndërkombëtare Stabilizuese do të vlerësohet më pas edhe kush do të jetë niveli konkret i trupave që do të dërgohen në Gaza, duke përfshirë këtu edhe vendndodhjen konkrete ku këto trupa do të dislokohen”, u shpreh ministri.
