Pronari i kompanisë “EMAAR”, Mohamed Alabbar, deklaroi sot në një intervistë në medie se projekti më i rëndësishëm turistik që po zbatohet në vendin tonë, “Durrës Yacht & Marina”, po avancon.
“Në fakt, e kemi nënshkruar marrëveshjen me qeverinë vetëm këtë vit në shkurt. Ndaj, në 10 muaj shumë gjëra kanë ndodhur. Sepse pas nënshkrimit të marrëveshjes duhet të bëjmë projektimin, projektimin e detajuar, tenderat, kontratat. Ndaj jam mjaft i kënaqur që brenda 10 muajsh ne jemi në kantier. Por shpresoj gjithashtu të mund të ecim më shpejt. Në anën e shitjeve, gjërat po shkojnë jashtëzakonisht shumë mirë.
Në fakt, më mirë se sa pritshmëritë e mia. Mendoj se duhet të shesim një stil jete. Pasi del nga apartamenti dhe bën një shëtitje me vajzën apo gruan tënde, si është kjo jetë? Si është xhiroja? Sa e sigurt është? Sa e pastër është? Si është peizazhi? Cilat janë shërbimet që ne ofrojmë atje? Ku është kafeneja? Ku është kopshti i vogël, parku? Ku është arti, dritat? Jam i fokusuar tek kjo”, u shpreh ai.
Ai thekson se Durrësi do të jetë një version modern i Dubait.
“Mendoj se Durrësi do të jetë një version modern i Dubait, apo kudo tjetër. Sepse, qytetet e mëdha ndërtohen, përfshirë Dubain. Gjithçka është ndërtuar 20, 50 vite më parë. Ne jemi në 2023-in, 2024 muajin tjetër, projektimi ka ndryshuar, shërbimet publike kanë ndryshuar, teknologjia ka ndryshuar, ndërtimi ka ndryshuar. Çfarë duam nga jeta ka ndryshuar. Do të jetë më argëtues, shumë më mirë”, deklaroi Alabbar.
Ky projekt parashikon ndërtimin e hoteleve, rezidencave private, shëtitoreve, dyqaneve, restoranteve superluksoze, mbi 80 mijë metra katrorë parqe dhe hapësira të hapura, si dhe 170 dyqane tregtare rreth portit të ri.
Punimet për ndërtimin e “Durrës Yachts & Marina”, janë të ndara në tre faza, ku në fazën e parë janë godinat, më pas infrastruktura dhe në fund Marina. Totali i këtij investimi të marrë përsipër nga biznesmeni nga Emiratet e Bashkuara Arabe, Mohamed Alabbar, llogaritet në afro 2 miliardë euro.
p.c. / dita
