Dy persona janë arrestuar dhe dy të tjerë janë proceduar penalisht pasi tentuan të fusnin disa mijëra euro nëpërmjet pikës kufitare të Muriqanit pa i deklaruar.
Policia njofton se në pranga kanë rënë pronari dhe drejtuesi i autobusit, Rando Aliu dhe Sybi Fezo, në kroskotin e të cilit ishin fshehur 82 010 euro.
Nën hetim u vunë dy drejtuesit e tjerë alternativë.
Paratë që u sekuestruan nga policia dyshohet se janë përfituar nga veprimtari kriminale.
Në të njëjtin autobus, në muajin shkurt të këtij viti, u gjetën edhe 48 mijë euro të cilat një 35-vjeçar i arrestuar, tentonte t’i nxirrte nga vendi ynë, pa i deklaruar.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme, për veprat penale “Mosdeklarimi në kufi i të hollave dhe i sendeve me vlerë” dhe “Pastrimi i produkteve të veprës penale ose veprimtarisë kriminale”.
