Shërbimi Informativ Shtetëror ka ndërhyrë ashpër që të përjashtojë Kombëtaren e Iranit që të marrë pjesë në Kampionatin Botëror të Peshëngritjes për të rinj që u zhvillua në Shqipëri, eveniment që uli siparin më 1 prill në qytetin e Durrësit. Kërkesa për të mos pajisur me viza shqiptare iranianët, ka ndezur ndërkohë debate të ashpra në distancë mes federatave në Tiranë dhe Teheran.
750 sportistë dhe stafet e tyre nga 45 shtete të botës ishin pjesëmarrës në këtë aktivitet ndërkombëtar të rinjsh, që Shqipëria prej dy vitesh po organizon, duke u bërë pjesë e axhendës ndërkombëtare të këtij sporti. Ky eveniment erdhi pas Europianit të të rinjve dhe Asamblesë së Përgjithshme Zgjedhore të Federatës Botërore (IWF), që u zhvillua në Tiranë vitin e shkuar. Në kuadër të marrjes së masave për organizimin e këtyre aktiviteteve, ku shumë vende pjesëmarrëse kanë nevojë të pajisen me viza, Federata Shqiptare e Peshëngritjes (FSHP), bashkëpunon me autoritetet vendore, si Ministria e Jashtme apo edhe Agjencitë e Inteligjencës. Por ndryshe nga herët e tjera, në eventin e fundit ka pasur një refuzim që nuk kishte ndodhur më parë.
Agjentët e Shërbimit Informativ janë paraqitur pranë zyrave të FSHP-së për të komunikuar edhe gojarisht refuzimin e 38 sportistëve dhe trajnerëve dhe stafeve të përfaqësueses së Iranit.
Ky ekip kombëtar nuk është lejuar të pajiset me viza për t’u futur në territorin e Republikës së Shqipërisë. Dhe Irani nuk mori pjesë në kampionatin botëror që u zhvillua në Durrës.
Aktivite të tilla, ku pjesëmarrësit vijnë me shpenzimet e tyre, janë një burim i konsiderueshëm të ardhurash për Federatën Shqiptare të Peshëngritjes.
Konfidencialisht për “Gazetën Si”, burime pranë FSHP-së bënë të ditur, se është tentuar disa herë nga autoritetet që të lejohej ekipi i Iranit. Për këtë ka pasur një kërkesë nga Federata Botërore e Peshëngritjes, e cila në qytetin e Durrësit gjatë organizimit të Botërorit, zhvilloi edhe mbledhjen e Komitetit Ekzekutiv.
Por autoritetet e sigurisë në Shqipëri ishin të prera në qëndrimin e tyre.
Tentativat e dështuara për të gjetur një rrugëzgjidhje kanë krijuar një valë të tensionuar komunikimesh mes FSHP-së dhe Federatës Iraniane të Peshëngritjes, e cila ka përfunduar me acarimin e palës iraniane, ku mes të tjerash në emailin e fundit, pasi kanë kuptuar se përpjekjet ishin të kota, shkruanin: “Ju mbeteni një vend komunist…”
Si pasojë, veç Rusisë dhe Bjellorusisë, dy kombëtare të pezulluara nga të gjitha federatat ndërkombëtare sportive për shkak të luftës ndaj Ukrainës, ndërprerja e marrëdhënieve diplomatike të vendit tonë me Iranin që nga muaji shtator i vitit të shkuar, solli edhe përjashtimin e përfaqësueses së Iranit nga Botërori i Peshëngritjes që u zhvillua në Shqipëri. / Gazeta Si
j.l./ dita
