Festat e fundvitit prej disa vitesh kanë ndryshuar nga festimet tradicionale ku të gjithë mblidheshin në shtëpi dhe argëtoheshin përgjatë orëve të fundit të 31 dhjetorit, duke i lënë vendin tashmë festimeve në mbrëmje gala pranë hoteleve e resorteve në bregdet.
Ardhja e turistëve të huaj ka sjellë zhvillime të tjera dhe tashmë duket se qyteti i Durrësit është kthyer në një destinacion të preferuar edhe në dimër. Surprizë janë turistët italianë, tregojnë menaxherët e strukturave hoteliere. “Tashmë 50% e kapacitetit është ezauruar dhe surprizë janë italianët të cilët kanë shfaqur interes të lartë si kurrë më parë për të festuar në Durrës në datat 31 dhjetor dhe 1 janar”– u shpreh Blerim Norja, menaxher hoteli.
Po kështu të shumtë janë bullgarët që do ta festojnë ndërrimin e viteve në Durrës.
“Rreth 60-70% e kapacitetit tonë hotelier është ezauruar, ndërkohë që klientela është besnike, duke pasur të njëjtat agjenci dhe vizitorë si vitet e mëparshme. Sidomos bullgarët të cilët janë në numër të lartë madje festimet i bëjnë një orë më parë (23:00) pasi festojnë me orën e tyre lokale.”– tha Albulen Ndrepepaj, menaxher i një resorti.
Durrësi prej vitesh është kthyer në një destinacion për pushime familjare ndryshe nga kryeqyteti ku mbizotërojnë organizimet rinore. Në qytetin bregdetar organizohen çdo vit mbrëmje gala larg qendrës së qytetit dhe pranë detit!
p.c. / dita
