Politikani i njohur grek dhe një prej themeluesve të Pasok-ut, Theodoros Pangalos, ka ndërruar jetë në moshën 84-vjeçare. Lajmi është bërë i ditur nga familja e tij.
I lindur në Elefsinë më 17 gusht 1938, biri i gjeneralit të Forcave Ajrore Georgios Pagalos, i cili shërbeu si Zëvendës Shefi i Forcave Ajrore, ai ishte dhe nipi i gjeneralit dhe diktatorit me emër Theodoros D. Pagalos.
Studioi drejtësi dhe financë në Universitetin e Athinës dhe me bursë nga qeveria franceze, në vitin 1973 u doktorua në Shkencat Ekonomike në Universitetin e Parisit 1 (Panthéon-Sorbonne).
Që në moshë të re, Pangalos u përfshi në lëvizjet studentore dhe më pas ka marrë pjesë në luftën kundër diktaturës dhe në vitin 1968 regjimi diktatorial i hoqi edhe shtetësinë greke, të cilën e rifitoi pas rënies së juntës ushtarake në vitin 1974.
Ai ishte gjithashtu anëtar themelues i Lëvizjes Rinore Demokratike “Grigoris Lambrakis”, si dhe i organizatës së majtë “Rezistenca Demokratike Studentore”, ndërsa ishte aktiv edhe në Partinë Komuniste Greke. Për herë të parë u zgjodh deputet i Atikës në vitin 1981 me PASOK-un dhe që atëherë u zgjodh në të gjitha garat elektorale në të cilat kandidoi.
Ka qenë zëvendësministër i Tregtisë (1982), zëvendësministër i Jashtëm për Çështjet e Komunitetit Evropian (1984), zëvendësministër i Jashtëm (1985-1989), përfaqësues i Parlamentit Grek në Këshillin e Evropës (1989-1993), ministër i Transportit dhe Komunikimit (1994).
Theodhoros Pangalos ishte ministër i Jashtëm i Greqisë në mandatin e Kostas Simitis (22 Janar 1996 – 19 Shkurt 1999), si dhe zëvendësministër i Jashtëm për disa mandate në vazhdim në gjithë periudhën (5 qershor 1985 – 8 korrik 1994), periudhë kur Pangalos ka ushtruar tepër vëmendje në marrëdhëniet me Shqipërinë. Madje, gjatë vizitës në Shqipëri kishte deklaruar në median vendase se me shqiptarët jemi “una faccia una razza”, që do të thotë “një fytyrë, një racë”.
Më 6 tetor 2009 u betua si zëvendëskryeministër deri në maj 2012, kur u tërhoq nga aktiviteti politik.Ai është autor i shumë artikujve dhe librave të ndryshëm për globalizmin, politikën e Jashtme, të Majtën ,çështjeve europiane etj.
Theodhoros Pangalos ishte gjithashtu njohës i gjuhës dhe kulturës arvanitase duke deklaruar hapur prejardhjen e tij prej arvanitasve të Atikës, ndërsa ka qenë shpeshherë objekt i reagimeve të ndryshme pas komenteve të tij negative për turqit, çështjes së udhëheqësit kurd Oçalan apo lëvizjes së të indinjuarve në vitet e krizës ekonomike greke pas vitit 2010.
Mbahet mend nga të gjithë edhe pas shumë vitesh komenti i tij në një studio televizive për falimentimin e Greqisë, kur deklaroi «Të gjithë bashkë , politikanë e qytetarë i hëngrëm lekët e vendit».
Ai ishte i martuar me Christina Christofakis dhe baba i pesë fëmijëve.
o.j/dita
