Rama në zyrë, protestuesit rrethojnë Kryeministrinë. Përplasje me Policinë

Në protestën e sotme në 1 shtator, protestuesit kanë ndryshuar skenarin e revoltës qytetare.Protestuesit fillimisht u mblodhën në hyrjen e Kryeministrisë për të bllokuar daljen, pasi kryeministri Edi Rama ndodhej në ambientet e Kryeministrisë. Para ambienteve të institucionit u vendos menjëherë edhe një numër i madh i efektivë të policisë. Teksa protestuesit po i afroheshin derës së Kryeministrisë, qytetarët janë përplasur me policinë. Pas paralajmërimeve përmes megafonëve, efektivët kanë ndërhyrë me forcë për të larguar protestuesit që tentonin të afroheshin edhe më shumë drejt godinës së Kryeministrisë. Gjatë përplasjeve, policia nisi përdorimin e gazit lotsjellës, ndërkohë në bulevard mbërriti edhe autoboti me ujë. Efektivët e policisë shoqëruan gjithashtu 11 persona, mes tyre Dritan Goxhaj, Arvina Lleshi dhe Kujtim Gjini. Pas shoqërimeve, protestuesit nisën marshimin dhe u ndanë në dy grupe. Disa janë zhvendosur drejt Komisariatit Nr. 1 dhe disa të tjerë drejt Komisariatit Nr. 3, ku ndodhen protestuesit e shoqëruar.Përpara komisariateve, protestuesit kanë kërkuar lirimin e qytetarëve të shoqëruar, duke bërë thirrje: “Lironi çunat, lironi gocat! Nuk jeni vetëm!”. “Arrestoni Ramën”, “O Ergys o legen prite Ramën se po vjen”, “Edi Rama frikacak”, “Dorëheqje, ju erdhi fundi”, “Policia e krimit”, “Edi Rama jep dorëheqjen”, “Edi Rama në burg”, “O Erion o legen prite Ramën se po vjen”, “Shqipëria e shqiptarëve, vdekje tradhtarëve”, “Pa rini nuk ka Shqipëri”, “Poshtë patronazhistët” dhe “Shqipëria kërkon revolucion”, janë disa nga thirrjet kryesore që protestuesit kanë brohoritur në kor. j.l./ dita