Lumturia është bërë si ‘grali i shenjtë’ i ekzistencës njerëzore. Koncepti, sa subjektiv aq edhe universal, është shpesh epiqendra e veprimeve, dëshirave dhe reflektimeve tona. Pavarësisht gjithpërfshirjes së saj në këngë, poezi dhe vepra arti gjatë epokave, thelbi i vërtetë i lumturisë duket se na rrëshqet nëpër gishta sa herë që mendojmë se e kemi. Është një paradoks i vazhdueshëm: ndonjëherë sa më shumë e kërkojmë, aq më i pakapshëm bëhet. Mirëpo herët e tjera na befason në qoshet më të papritura të përditshmërisë.
Dhe në këtë enigmë rreth asaj që na bën vërtet të lumtur, studiuesit nga Universiteti i Harvardit filluan një studim që kërkon të deshifrojë këtë kompleksitet nga një këndvështrim shkencor. Ajo që ata zbuluan jo vetëm që hedh dritë mbi mekanizmat e lumturisë, por gjithashtu na fton të reflektojmë mbi atë që ka vërtet rëndësi në udhëtimin tonë nëpër jetë.
Pjekuria ofron një vështrim të ri në jetë
Pas analizimit të jetës së 724 individëve, duke përfshirë studentë të Harvardit dhe banorë të një prej lagjeve më të varfra të Bostonit, shkencëtarët kanë arritur në përfundimin se njerëzit janë më të lumtur pas moshës 60-vjeçare. Dhe pse ndodh kjo? Me kalimin e kohës, ne kuptojmë se jeta nuk është e pafundme. Rrudhat në pasqyrë, miqtë dhe të dashurit që largohen nga ne dhe pakësimi i energjisë sonë vazhdimisht na kujtojnë kufijtë e ekzistencës sonë.
Këto sinjale mund të jenë të vështira për t’u menaxhuar dhe madje të dhimbshme, por ato ofrojnë gjithashtu një mundësi unike: të rivlerësojmë dhe rikalibrojmë atë që vlerësojmë me të vërtetë. Prandaj, sipas ekspertëve, në momentin kur arrijmë të 60-at, fillojmë të pranojmë kufijtë e jetës dhe pashmangshmërinë e vdekjes, gjë që na çon në ndryshimin e prioriteteve, duke hequr qafe përgjegjësitë dhe marrëdhëniet e panevojshme. Tani, ju mund të jeni duke menduar: “Shkëlqyeshëm! Por çfarë duhet të bëj ndërkohë që pres të mbush 60? Epo, studimi i Harvardit e ka përgjigjen. Çelësi i lumturisë, pavarësisht nga mosha, qëndron në marrëdhëniet tona me të tjerët. Dhe jo, nuk bëhet fjalë për të pasur mijëra miq në rrjetet sociale apo për t’u rrethuar nga turma në festa.
Psikiatri Robert Waldinger dhe psikologu Marc Schulz, përgjegjës për këtë hetim monumental, theksojnë tre pika kyçe rreth marrëdhënieve:
Lidhjet sociale janë të mira për ne. Në këtë kuptim, vetmia ndikon vetëm në lumturinë tonë, por edhe avancon sëmundjet që lidhen me pleqërinë. Nuk ka rëndësi numri i miqve apo nëse keni një partner, por cilësia e marrëdhënieve të ngushta. Një marrëdhënie e mirë jo vetëm që sjell përfitime për shëndetin tonë emocional, por gjithashtu mbron trupin dhe trurin. Një fakt interesant për t’u theksuar është se ata që në moshën 50-vjeçare kishin marrëdhënie të forta shoqërore, e përballuan dekadën e tetë të jetës në kushte më të mira sesa ata që nuk kishin lidhje të forta. /A.Q./
