Moisi Habilaj, i dënuar me 15 vite burg në mungesë për trafikim droge, është arrestuar mbrëmjen e sotme.
Mwsohet se ai u arrestua në një lokal në Borsh nga forcat operacionale.
Gjykata e Posaçme e dënoi më 28 janar 2026, me 15 vite burg Moisi Habilajn, si drejtues i një grupi kriminal të trafikut ndërkombëtar të drogës.
Habilaj ishte në kërkim që prej janarit 2021, kohë kur u arratis nga autoritetet italiane.
Hetimet për ta nisën në vitin 2018 në Shqipëri, pas publikimit të disa përgjimeve të drejtësisë italiane, e cila kishte hetuar grupin për vite me radhë.
Ndërkohë, në dhjetor 2025, Gjykata e Posaçme dënoi edhe katër anëtarë të tjerë të grupit me 32 vite burg në total.
Organizata e Habilajve bëri bujë në arenën politike shqiptare në tetor 2017, pasi publikimi i dosjes italiane ekspozoi lidhjen e tyre me ish-ministrin e Brendshëm, Saimir Tahiri.
Edhe pse Tahiri u akuzua nga ish-Prokuroria për Krime të Rënda për trafik droge dhe pjesëmarrje në organizatë kriminale, ai u dënua nga gjykata respektive për shpërdorim detyre. Paralelisht me Tahirin u shpall fajtor edhe Jaeld Çela, ish-drejtues i policisë së Vlorës.
j.l./ dita
