Kombëtarja U-21 do të zhvillojë një tjetër test të rëndësishëm ndërkombëtar, teksa më 8 qershor 2026 do të përballet me Italinë në stadiumin “Omero Tognon” në Pordenone.
Federata Shqiptare e Futbollit nëpërmjet një komunikate për shtyp bën të ditur arritjen e marrëveshjes me Federatën Italiane të Futbollit për zhvillimin e kësaj ndeshjeje që do të luhet në orën 18:15 të 8 qershorit.
Kjo përballje do të jetë ndeshja e dytë miqësore e programuar të luhet në muajin qershor nga Kombëtarja U-21. Ndërkohë, FSHF është duke punuar për të finalizuar edhe një tjetër ndeshje miqësore, që pritet të zhvillohet gjatë javës së parë të muajit qershor.
Këto ndeshje miqësore janë pjesë e përgatitjeve të Kombëtares U-21 në kuadër të Kampionatit Europian U-21 2027, ku Shqipëria është e kualifikuar automatikisht si një nga vendet organizatore.
Skuadra kuqezi vjen në këtë fazë me një formë shumë pozitive, duke regjistruar katër fitore në katër ndeshjet e fundit miqësore. Takimet e qershorit do t’i shërbejnë stafit teknik, të drejtuar nga Alban Bushi, për të vlerësuar dhe testuar elementët e grupit në prag të përfundimit të sezonit 2025-2026.
j.l./ dita
