Mijëra mbështetës të kryeministrit të Spanjës, Pedro Sánchez, janë mbledhur në rrugët e Madridit në një përpjekje për ta bindur atë të mos japë dorëheqjen. Lideri socialist habiti vendin të mërkurën duke njoftuar se po anulonte të gjitha angazhimet zyrtare për të reflektuar për të ardhmen e tij.
Ai e mori vendimin pasi një gjykatë hapi një hetim fillestar ndaj gruas së tij mbi pretendimet për korrupsion. Sanchez do të shpallë vendimin për të ardhmen e tij të hënën. Mbështetësit socialistë udhëtuan me autobus nga i gjithë vendi për të marrë pjesë në një demonstratë mbështetjeje për Sánchez jashtë selisë së partisë së tij në Madrid, duke brohoritur “Pedro, mos u dorëzo” dhe “Ti nuk je vetëm”.
Një nga ata mbështetës, Sara Dominguez, një konsulente në të 30-at e saj, tha se shpresonte që qeveria e Sanchez kishte ndërmarr hapa të mirë për gratë, komunitetin LGBT dhe pakicat. Jose María Diez, një zyrtar qeveritar 44-vjeçar i cili erdhi nga Valladolidi në Spanjën veriore për të shprehur mbështetjen e tij, tha se ekzistonte një mundësi reale që e djathta ekstreme të mund të merrte pushtetin nëse Sanchez largohej.
“Kjo do të thotë një hap prapa për të drejtat dhe liritë tona”, tha ai.
Delegacioni i qeverisë qendrore në Madrid tha se morën pjesë 12.500 persona. Sánchez njoftoi vendimin e tij për të marrë në konsideratë dorëheqjen e tij në të njëjtën ditë kur u zbulua se një gjykatë e Madridit po hapte një hetim ndaj gruas së tij, Begoña Gómez, pas akuzave për shitje të ndikimit.
Akuzat u ngritën kundër saj nga organizata Manos Limpias (Duar e Pastra), e drejtuar nga një njeri i lidhur me të djathtën ekstreme të quajtur Miguel Bernad. Hetimi paraprak po shqyrton lidhjet e zonjës Gómez me kompanitë private që siguruan paratë e qeverisë ose kontratat publike. Në mënyrë të veçantë, po shqyrton marrëdhënien midis një fondacioni që ajo drejtonte të quajtur IE Africa Center dhe grupit të turizmit Globalia, linja ajrore e të cilit Air Europa mori një ndihmë prej 475 milion € (407 milion £) gjatë krizës Covid-19.
Sánchez dhe aleatët e tij kanë këmbëngulur se akuzat, të cilat janë raportuar gjerësisht në mediat e krahut të djathtë, janë false. Të enjten, prokurorët publikë në Madrid kërkuan që hetimi të hiqet për shkak të mungesës së provave. Padia e zotit Bernad përbëhet nga prerje lajmesh, njëra prej të cilave tashmë është vërtetuar e rreme. Sánchez, i cili drejton një qeveri koalicioni, ka thënë se akuzat kundër gruas së tij ishin përpjekja e fundit e partive dhe mediave të krahut të djathtë për ta minuar atë.
j.l./ dita