Benjamin Netanyahu i ka ofruar një marrëveshje të re Hamasit që do të bënte që Izraeli të paguante 1 milion dollarë për secilin nga pengjet e mbetura të 7 tetorit dhe të lejonte që pengmarrësit e tyre të largoheshin.
Plani i kryeministrit izraelit do të përfshinte ushtrinë e vendit të tij që të garantonte kalim të sigurt nga Gaza për palestinezët që mbajnë peng izraelitë.
Një zyrtar izraelit tha se pengmarrësit dhe familjet e tyre do të lejohen të largohen nga Gaza dhe të shmangin kapjen ose ndëshkimin sipas marrëveshjes, me qeverinë izraelite që do të paguajë miliona për pengjet.
Nisma u vu në lëvizje pas mbledhjes së kabinetit të sigurisë të së dielës, në të cilën u diskutua për situatën e pengjeve.
Hamasi nuk i është përgjigjur ende nismës, e zbuluar fillimisht nga transmetuesi izraelit Channel 12.
Lëvizja vjen pasi grupi terrorist hodhi poshtë një propozim të paraqitur nga Egjipti që do të kishte shpallur një armëpushim dy-ditor në Gaza nëse do të kishin rënë dakord të kthenin katër pengje izraelite.
Antony Blinken, sekretari amerikan i shtetit, tha se Hamasi “refuzoi edhe një herë të lirojë qoftë edhe një numër të kufizuar pengjesh për të siguruar një armëpushim dhe lehtësim për popullin e Gazës”.
Taher al-Nunu, një zyrtar i Hamasit, i tha AFP se ideja e një “pauze të përkohshme në luftë, vetëm për të rifilluar agresionin më vonë, është diçka për të cilën kemi shprehur tashmë qëndrimin tonë”.
“Hamasi mbështet një përfundim të përhershëm të luftës, jo një të përkohshëm”.
i.b./dita
