Nga tryezat e institucioneve të larta, te prangat në kufi: Kush është Fehim Sali, mësuesi që spiunonte për shërbimin sekret serb

Nga Rrezon Ademi

Shtetasi i Kosovës, Fehim Sali, i cili për vite me radhë lëvizte lirshëm në ambientet më të larta shtetërore si përfaqësues i komunitetit goran, u arrestua në pikën kufitare të Merdarës gjatë një operacioni të përbashkët të Agjencisë Kosovare të Inteligjencës (AKI), Policisë së Kosovës dhe Prokurorisë Speciale.

Sali, 61 vjeç, po tentonte të kalonte drejt Serbisë në orët e para të mëngjesit, kur u ndalua nën dyshimet e bazuara për kryerjen e veprës penale të “Spiunazhit”.

​Sipas Prokurorisë Speciale dhe hetimeve të zhvilluara prej më shumë se një viti, i pandehuri dyshohet se kishte krijuar një rrjet të mirëfilltë informativ në dobi të Agjencisë Serbe të Sigurisë dhe Informacionit (BIA). Gjatë seancës dëgjimore në Gjykatën Themelore në Prishtinë, prokurori i rastit, Bekim Kodraliu, deklaroi se vetë i arrestuari e ka pranuar rekrutimin dhe kontaktet e vazhdueshme me operative të inteligjencës serbe.

Rekrutimi nga BIA dhe fotografimi i zyrtarëve të AKI-së

​Dosja hetimore zbardh se Fehim Sali ishte rekrutuar drejtpërdrejt nga zyrtari i lartë i BIA-s serbe, Zheljko (Zhelimir) Matoviq. Nën udhëzimet e këtij të fundit, arsimtari nga Dragashi dyshohet se kryente detyra me ndjeshmëri të lartë për sigurinë kombëtare të Kosovës.

​Ndër detyrat kryesore që u faktuan nga hetimet e AKI-së dhe Policisë përfshiheshin:

Identifikimi dhe fotografimi i operativëve të AKI-së: Sali mblidhte të dhëna mbi zyrtarët e inteligjencës kosovare dhe i përcillte ato te eprorët e tij në BIA.

​Mbledhja e informacioneve politike: Duke shfrytëzuar qasjen e tij në takime me zyrtarë të lartë, ai informonte shërbimin serb mbi zhvillimet brenda institucioneve të Kosovës dhe në rajonin e Gorës.

Rekrutimi i objektivave të rinj: Ndërmjetësimi dhe identifikimi i personave me ndikim në komunitetet joshumicë që mund të shërbenin si burime potenciale për BIA-n.

Nga Këshilli i Presidencës deri te takimet me Albin Kurtin

​I maskuar pas profilit të një mësuesi të shkollës fillore “9 Maji” në Rapçë të Dragashit (që funksionon brenda sistemit parallel serb), Sali kishte arritur të depërtonte në nivelet më të larta të pushtetit në Prishtinë.

Ai ka shërbyer për dy mandate (2020–2024) si anëtar i Këshillit Konsultativ për Komunitete pranë Zyrës së Presidentes së Kosovës. Mirëpo, më 3 maj 2024, ai u shkarkua nga kjo pozitë me propozim të sekretarit të Këshillit, pas sinjalizimeve të para që kishin mbërritur nga institucionet e sigurisë.

​Krahas pranisë në Presidencë, dokumentet dhe fotografitë zyrtare tregojnë se Sali kishte marrë pjesë edhe në takime të drejtpërdrejta në Zyrën e Kryeministrit Albin Kurti. Paralelisht me këtë aktivitet në Kosovë, në mediat lokale u publikuan fotografi të tij me figura qendrore të politikes në Beograd, përfshirë Ministrin e Brendshëm të Serbisë, Ivica Daçiq, si dhe të dhëna për angazhimin e tij në grumbullimin e votave për partitë e pushtetit në Serbi (SNS dhe SPS) përmes organizatës së tij “Moja Gora”.

​Qindra mijëra euro dhe prova materiale të konfiskuara

​Pas arrestimit në Merdarë, me urdhër të Prokurorisë Speciale, hetuesit e Krimeve të Rënda realizuan një bastisje blic në shtëpinë e tij në Dragash.

Gjatë kontrollit, Policia konfiskoi prova të rëndësishme materiale:

-​ 39,500 euro dhe 500 dinarë para të gatshme, të cilat prokuroria i konsideron si dobi pasurore të përfituar drejtpërdrejt nga veprimtaria e spiunazhit.

– 4 telefona celularë me aplikacione e komunikime të enkriptuara.
​Dokumente të shumta konfidenciale, certifikata dhe dosje pronësore.

​Prokuroria Speciale tashmë i është drejtuar Gjykatës Themelore në Prishtinë me kërkesën për caktimin e masës së paraburgimit prej 30 ditësh, ndërsa prokurori Bekim Kodraliu konfirmoi se pas kompletimit të analizës së provave dixhitale, ndaj Fehim Salit do të ngrihet aktakuzë zyrtare për cenim të rendit kushtetues dhe spiunazh.

DITA