Rusia dhe Ukraina kanë kryer sot një nga shkëmbimet më të mëdha të robërve të luftës që nga nisja e konfliktit në vitin 2022. Në këtë shkëmbim janë përfshirë të rinj nën moshën 25 vjeç si dhe persona të plagosur rëndë.
Të dyja palët e konfirmuan operacionin, që vjen si rezultat i bisedimeve të drejtpërdrejta të mbajtura në Stamboll më 2 qershor.
Gjatë atyre bisedimeve, u arrit një marrëveshje për shkëmbimin e të paktën 1.200 robërve nga secila palë, si dhe për riatdhesimin e mijëra trupave të ushtarëve të vrarë gjatë luftimeve. Ky konsiderohet si një nga të paktët hapa humanitarë për të cilët Moska dhe Kievi kanë gjetur gjuhë të përbashkët, ndërkohë që negociatat më të gjera për paqe mbeten të bllokuara.
“Sot ka nisur shkëmbimi i robërve të luftës. Procesi është i ndërlikuar dhe përfshin shumë detaje të ndjeshme. Po bëjmë gjithçka që secili prej tyre të kthehet në shtëpi”, deklaroi Zelensky përmes Telegramit.
Ndërkohë, Ministria e Mbrojtjes e Rusisë njoftoi se shkëmbimi është realizuar me numër të barabartë ushtarësh nga të dyja palët, pa dhënë shifra të sakta. Po ashtu, u bë me dije se ushtarët rusë të kthyer ndodhen aktualisht në Bjellorusi, ku po marrin ndihmë mjekësore dhe psikologjike përpara se të transferohen për trajtim të mëtejshëm në Rusi.
Këshilltari i Kremlinit, Vladimir Medinsky, kishte deklaruar më herët se një listë prej 640 robërve të luftës rusë i është dorëzuar Ukrainës.
Shkëmbimi pritet të vazhdojë edhe në ditët në vijim, në një proces që shihet si shenjë e rrallë bashkëpunimi mes dy vendeve në konflikt.
