Nga Valbona Daci
Në Fier, mëngjesi i Kristaq Thanos fillon me një kafe të ngrohtë, përpara se telefoni të fillojë të bjerë. Lajmi nuk pret. As ai. Katër dekada mes bllokut të shënimeve, kamerës, redaksive që ndryshuan emra, sisteme që ndryshuan fytyrë. Kohët nuk ishin gjithmonë të lehta për t’u jetuar. Por një gjë nuk ndryshoi. Ai mbeti aty.
Kristaq Thano është nga ai brez gazetarësh që nuk e kanë parë profesionin si trampolinë, por si shërbim dhe detyrim moral ndaj qytetit. Oferta për të shkuar në Tiranë ka pasur. Mund të kishte zgjedhur një zyrë më të madhe, një jetë më komode. Por ai nuk u largua kurrë nga Fieri.
“Vetëm këtu jam vetvetja”, thotë.
Karriera e tij nisi në maj të vitit 1974, në gazetën “Drapër e Çekan”. Ishte një kohë tjetër, me rregulla të tjera, me kufij të tjerë për fjalën. Ai e jetoi gazetarinë në dy epoka, para dhe pas viteve ’90.
E përjetoi ndryshimin e sistemit, të lirisë së shprehjes, të mënyrës si prodhohet dhe transmetohet lajmi. Nga “Bashkimi” te “ATSH”, nga “Puna” te gazetat e tranzicionit si “Republika”, “Ballkan” e “Shekulli”. Nga shtypi i shkruar në ekranet e TVA, TV Koha, Planet, TV Klan, Ora News dhe sot në Report Tv.
Ndërroi redaksi, por jo karakter. Kristaqi është gazetar i shkollës së qetësisë. Nuk bërtet. Nuk nxiton të gjykojë. Në median e sotme zhurma shpesh mbizotëron mbi përmbajtjen. Ai ka mbetur i njëjti, i matur, qytetar, i përkushtuar.
“Të rri në shtëpi? Jo. Do të ishte e mërzitshme”, thotë me një buzëqeshje të butë.
Për të, gazetaria nuk është punë me orar. Është mënyrë jetese dhe nevo për të qenë aty ku ndodh diçka, qoftë edhe një histori e vogël njerëzore në një periferi të Fierit.
Është vlerësuar me medaljen “Naim Frashëri” klasi i dytë dhe me titullin “Nderi i Qytetit”. Por ata që e njohin e dinë se dekorata më e madhe e tij është besimi i njerëzve. Ajo ndjesi që kur e sheh në terren, e di se do trajtohesh me dinjitet.
Edhe sot, pas kaq vitesh, nuk mungon në trajnime. Vazhdon të mësojë. Vazhdon të përmirësohet. Vazhdon të besojë se gazetaria nuk mbaron kurrë së ndërtuari.
Prej katër vitesh mban edhe përgjegjësi institucionale si Kryetar i Shoqatës Europiane të Gazetarëve, Seksioni Tiranë – Dega Fier, dhe zv.president i Shoqatës së Gazetarëve Europianë – Albania.
Por mbi të gjitha, ai mbetet gazetari i qytetit të tij. Në një kohë kur shumëkush largohet, ai zgjodhi të qëndrojë. Për Kristaq Thanon, Fieri nuk është thjesht vend pune. Është shtëpi. Gazetaria, është mënyra e tij për ta dashur atë çdo ditë.
Gazetare e ABC
