Gazetari i A2CNN, Armand Bajrami, ka publikuar të enjten në faqen e tij në Facebook një thirrje në lidhje me adresën elektronike të rreme që vijon të qarkullojë prej disa javësh me emrin e tij dhe me të dhënat e tij personale.
Kjo adresë e cila përmban emrin dhe mbiemrin e plotë të gazetarit shqiptar dërgon kërkesa informacioni drejtuar institucioneve juridike në emër të tij.
“Prej disa javësh një person i paautorizuar ka hapur një adresë false elektronike me emrin dhe mbiemrin tim nga nje domain në të cilin nuk kam llogari, [email protected].
Ai po e përdor këtë për të dërguar kërkesa për informacion pranë institucioneve të ndryshme të drejtësisë.
Në mailet ku pretendon të jetë Armand Bajrami, gazetar në A2CNN, bashkangjit një fotokopje të ID-së sime, që nuk e di si e ka siguruar, numrin tim të telefonit si edhe adresën zyrtare të televizionit #A2CNN ku unë punoj.
Një plan gati perfekt me qëllime të paqarta.
Pasi u njoha me këto episode, me shqetësim kam nxituar të bëj kallëzim penal pranë Prokurorisë së Tiranës dhe asaj të Elbasanit, territore në të cilat kanë mbërritur emailet.
Kopjen e kartës sime të identitetit e kam lënë vetëm ne institucione publike apo private, ku (ne parim dhe sipas ligjit) duhet të më mbrohen të dhënat personale.
Shqetësimi është serioz, pasi ky person përmes adresës së falsifikuar, mund të komunikojë me persona apo institucione të tjerë, nën emrin tim, apo të televizionit A2CNN, duke me vendosur në situata të paqena, ndoshta edhe penale.
Teksa besoj që autoritetet ku kam adresuar shqetësimin do ta bëjnë punën e tyre, i lutem kujtdo që më ndjek këtu, të mos marrë në konsideratë mesazhe që mund të vijnë nga adresa [email protected], edhe pse shoqërohet me kartën time të identitetit”, shkruan Bajrami në Facebook.
a.c./dita
