Papa Francesku i kërkon BE-së humanizëm për emigrantët që zbresin në brigjet e Europës, duke e cilësuar fenomenin më shumë “një realitet afatgjatë” sesa një emergjencë.
“Ata që rrezikojnë jetën në det nuk vijnë për të pushtuar, ata kërkojnë vetëm mirëpritje, kërkojnë mundësi për jetën”, tha ai në një fjalim të mbajtur në Marsejë.
“Dhe nëse flitet për emergjencë, fenomeni i emigracionit nuk është urgjencë e kohëve të fundit, gjithnjë e dobishme për të ushqyer propagandën e alarmit, por një realitet i kohës në të cilën jetojmë, një proces që përfshin tri kontinente rreth Mesdheut dhe duhet qeverisur me largpamësi, përfshirë një përgjigje europiane që përballet me vështirësi”, citohet ai nga AP.
Papa tha se Mesdheu po kthehet nga mare nostrum në mare mortum, termat në latinisht për ‘deti ynë” dhe “deti i vdekjes”. Deklarata e Atit të Shenjtë vjen në një moment kur numri i emigrantëve që mbërrijnë në Lampedusa është rritur. Ishulli i vogël mes Sicilisë dhe Tunizisë është kontakti i parë me Europën për mijëra emigrantë që largohen nga Afrika.
Më shumë se 10 mijë emigrantë kanë mbërritur aty javët e fundit. Kjo rritje e numrit të emigrantëve bëri që presidentja e Komisionit Europian t’i kërkonte kryeministres italiane marrjen e masave të menjëhershme. Ndërkohë, Franca ka shtuar kontrollet në kufi me Italinë.
p.c/dita
