Presidenti ukrainas Volodymyr Zelensky ftoi zyrtarisht liderin kinez Xi Jinping për të vizituar Ukrainën, në një intervistë për Associated Press të botuar të mërkurën.
“Ne jemi gati që ai të vijë këtu. Unë dua të flas me të. Unë kam pasur kontakte me të para luftës në shkallë të gjerë. Por gjatë gjithë këtij viti, më shumë se një vit, nuk kam pasur”, tha Zelensky për agjencinë e lajmeve.
Xi dhe presidenti rus Vladimir Putin janë aleatë të ngushtë dhe kanë forcuar lidhjet ekonomike dhe politike që kur Moska pushtoi Ukrainën vitin e kaluar.
- Publicitet -
Pas vizitës shtetërore të Xi në Moskë në fillim të këtij muaji, liderët kinezë dhe rusë përsëritën mbështetjen e tyre për një sërë çështjesh, por bisedimet e tyre nuk treguan asnjë përparim në zgjidhjen e konfliktit të Ukrainës.
Duke folur për betejën disamujore për qytetin lindor të Bakhmut, Zelensky tha për AP se një disfatë e Ukrainës do të nxiste përpjekjet propagandistike të Rusisë dhe do ta inkurajonte Putinin që të përparonte.
“Nëse Bakhmut do të binte në duart e forcave ruse, presidenti i tyre, Vladimir Putin, do t’ia shiste këtë fitore Perëndimit, shoqërisë së tij, Kinës, Iranit”, tha Zelensky.
Udhëheqësi ukrainas foli me AP në bordin e një treni që kalonte nëpër Ukrainë, në qytete pranë disa prej luftimeve më të ashpra, ku forcat e vendit të tij kanë zmbrapsur me sukses pushtimin e Rusisë.
j.l./ dita
