Presidenti i Serbisë, Aleksandër Vuçiç, është dorëzuar para rezistencës së qeverisë së Kosovës lidhur me mënyrën e organizimit të zgjedhjeve të reja në veri.
“Unë do t’i kërkoja qytetarëve tanë që të dalin me iniciativa për të organizuar zgjedhjet në këto katër komuna sa më shpejt”, u shpreh ai.
Më përpara ka refuzuar kategorikisht, largimin e kryetarëve me peticion dhe kërkoi vetëm dorëheqjen e tyre.
Vuçiç shtoi se kjo duhet të bëhet në mënyrë që levat bazë të qeverisjes të jenë në duart e serbëve që jetojnë në veri të Kosovës.
“Për ne është e rëndësishme që të përpiqemi të vazhdojmë dialogun edhe pse Prishtina nuk e dëshiron”, pretendoi ai.
Presidenti serb foli edhe për seancën e Këshillit të Sigurimit të OKB-së që mbahet për raportin e UNMIK-ut për Kosovën më 23 tetor.
“Ata kërkojnë mbylljen e seancës së Këshillit të Sigurimit të OKB-së, sepse kanë frikë se çfarë mund të them unë”, u shpreh Vuçiç.
Ai më tej tha me bindje të plotë se ndaj Serbisë nuk do të vendosen sanksione, pas sulmit të armatosur në Banjskë të Kosovës.
