Organizata nuk dëmtohet nga kritika e ndershme – por nga përçarja me qëllim

Fyerjet, thirrjet për vetëgjyqësi dhe agresiviteti publik nuk janë argument – janë shenja dobësie. Replikë e detyruar me z. Bashkim Koçi

Në thelb të çdo organizate vullnetare qëndron një parim i thjeshtë, por shpesh i harruar: kontributi personal është masa e vlerës së çdo anëtari. Nuk është pyetja “çfarë bëri organizata për mua”, por “çfarë bëra unë për organizatën” ajo që përcakton seriozitetin dhe integritetin e angazhimit.

Në momentin kur dikush kërkon llogari pa dhënë asnjë kontribut real, lind dyshimi i arsyeshëm se prania e tij nuk udhëhiqet nga idealizmi, por nga interesa personale apo tendenca për të krijuar përçarje. Dhe pikërisht këtu nis dobësimi i çdo strukture që pretendon të mbështetet mbi vlera dhe bashkëpunim.

Duke lexuar shkrimin tuaj z. Bashkim për kulturë mediatike sqarojmë:

Së pari, z. Bashkim, prej më shumë se një viti e gjysmë ju keni zgjedhur një rrugë që nuk i shkon asnjë intelektuali dhe as një ish-anëtari të një organizate me histori si OVP e LANÇ-it: baltosjen publike në rrjetet sociale të punës, historisë dhe njerëzve me të cilët keni qenë deri dje pjesë.

Një njeri me integritet nuk i nxjerr kurrë në “pazar” çështjet e brendshme të organizatës apo të “shtëpisë” së tij. Kjo nuk është praktikë në asnjë organizatë serioze në botë. Kjo është çështje karakteri. Dhe, fatkeqësisht, tek ju sot shfaqet si mungesë qetësie, mungesë komunikimi intelektual dhe humbje e ekuilibrit. Fyerjet, thirrjet për vetëgjyqësi dhe agresiviteti publik nuk janë argument – janë shenja dobësie.

Së dyti, në shkrimet tuaja, përfshirë atë te e mirënjohura “Dita”, ju përçmoni punën e OVP të LANÇ-it dhe sulmoni drejtuesit me gjuhë fyese. E vërteta është krejt ndryshe: që prej largimit tuaj, organizata ka punuar më e qetë dhe më e bashkuar. Vetëm gjatë këtij viti (për 3 muaj) janë zhvilluar 41 aktivitete në gjithë vendin – përkujtime betejash, homazhe për dëshmorët, simpoziume shkencore, aktivitete për brigada e batalione historike. Këto janë fakte, jo retorikë. Ne punojmë me idealizëm; ju sulmoni me negativitet. Kjo është diferenca.

Së treti, është fakt i dokumentuar që largimi juaj nga detyra nuk ishte rastësi, por pasojë e sjelljes suaj. Ishte vetë z. Hulusi Hako ai që ju kritikonte në mënyrë të vazhdueshme për arrogancë dhe mungesë etike në mbledhje. Procesverbalet ekzistojnë. Ju vetë deklaronit me zë të lartë: “Jam Bashkim Koçi, jam i Zërit të Popullit, nuk më arrini dot!”. Sot lind pyetja e thjeshtë: si ka mundësi që pikërisht me të njëjtin person, që ju largoi dhe me të cilin përplaseshit, sot jeni në një krah? Për interesa të ngushta?

Së katërti, gjatë kohës që drejtonit gazetën “Kushtrim Brezash”, ajo humbi vizionin kombëtar dhe u ngushtua në një frymë lokale. Kjo nuk është opinion personal, por kritikë e bërë në mënyrë të përsëritur nga vetë anëtarët në mbledhje. Ankesa kryesore ishte e njëjtë: mungesë komunikimi, mbyllje ndaj anëtarësisë dhe arrogancë në drejtim. Nëse mendoni të kundërtën, hajde dhe ballafaqohu publikisht me strukturat.

Së pesti, ju flisni për “shkelje statuti”. Atëherë përgjigjuni qartë:
– A jeni dakord me nismën për bashkim me OBVL që nuk njeh 29 Nëntorin?
– A jeni dakord me përdorimin e fondeve të organizatës për interesa personale?
– A jeni dakord që gazetarët të mos paguhen, ndërkohë që fondet përdoren për privilegje individuale?

Këto janë çështjet reale të statutit, jo retorika boshe. Ju, znj. Anila Gjokoreci, z. Kastriot Haderi dhe znj. Rezarta Mona Hako, nuk ju bashkon një ideal i përbashkët, por interesa personale dhe një karrierizëm i sëmurë që dëmton çdo përpjekje serioze. Ndërsa ju shihni organizatën si një mundësi për përfitime dhe poste, ne e shohim si një mision për të ruajtur historinë dhe për të nderuar lavdinë e saj. Ky është dallimi thelbësor mes nesh. Ne nuk jemi këtu për interesa, por për vlera.

Së gjashti, edhe e pamoralshmja ka një kufi. Ju, që deri dje e keni sulmuar rëndë z. Hulusi Hako, sot e mbroni. Pse? Për çfarë qëllimi? Kjo sjellje nuk ka lidhje me parime, por me interesa.

Për të gjitha këto veprime, fyerje dhe shpifje, çështja tashmë është në rrugë ligjore dhe ju do të mbani përgjegjësi. Së fundmi, OVP e LANÇ-it, është dhe do të mbetet një organizatë e bashkuar, që punon çdo ditë me idealizëm për ruajtjen e vlerave historike dhe ndërgjegjes kombëtare. Ne nuk do të lejojmë që buxheti modest të përdoret për interesa personale dhe as që elementë përçarës të dëmtojnë kauzën tonë. Nëse do të kishit mbështetje reale, ajo do të reflektohej në Komitetin Kombëtar.

Por në mbledhjen e fundit, ju dhe bashkëpunëtorët tuaj u kritikuat ashpër dhe mbetët pa asnjë mbështetje. Z. Hulusi u largua me votë unanime duke thënë mes 100 burrave: “Unë po largohem do shikoj punët dhe hallet e mia” (e filmuar). Po ju interesaxhinjtë se latë! Ky është një fakt që nuk mund të zhbëhet me deklarata apo me zhurmë mediatike.

Në një shoqëri demokratike, statuti dhe vota janë themeli i çdo organizate – ato janë të shenjta dhe të paprekshme. Rruga e fyerjeve, shpifjeve dhe përbaltjeve nuk është alternativë. Ajo nuk është debat, por degradim. Është gjuha e rrugës, gjuha e anarkisë, që synon të zëvendësojë rregullin me kaosin. Postet dhe përfitimet materiale nuk merren me forcë, por fitohen me punë, djersë, korrektësi dhe respektim të ligjit. Kjo është rruga e dinjitetit dhe e qytetarisë.

Çdo përpjekje për t’i marrë ato përmes vetëgjyqësisë, dhunës apo thyerjes së dyerve me leva dhe britma nuk është veprim, por shkelje e rëndë. Kjo nuk quhet angazhim – kjo quhet vandalizëm.
Ne zgjedhim të qëndrojmë në anën e ligjit, të statutit dhe të dinjitetit. Fitojeni me gjyq! Një njeri që e quan veten gazetar nuk mburret, nuk rreh gjoksin dhe nuk fyen. Ai nuk nxit vetëgjyqësi dhe as nuk i shmanget ligjit. Përkundrazi, ai respekton ligjet e shtetit, zbaton statutin dhe frymon me normat e demokracisë.

Gazetaria është përgjegjësi, jo tribunë për britma. Është etikë, jo arrogancë. Është shërbim ndaj së vërtetës, jo mjet për përçarje. Britmat dhe levat nuk kanë vend tek ne – ato i përkasin një bote që ne nuk e pranojmë. Një fjalë e urtë thotë: vlerat e njeriut nuk maten nga britmat dhe fyerjet, por nga veprat dhe korrektësia. Fatkeqësisht, ju jeni larg këtyre standardeve.

Prandaj, z. Bashkim, në vend të sulmeve, tregoni kulturë, përgjegjësi dhe dinjitet.
Sepse organizata nuk dëmtohet nga kritika e ndershme – por nga përçarja me qëllim.

Kryesia e OVP të LANÇ-it