Kreu i AAK-së, Ramush Haradinaj, ish-Kryeministër i Kosovës, ka reguar ditën e sotme për Panairin e Ndërkombëtar të Verës i cili është organizuar për herë të parë këtë vit në Beograd si nismë e 3 vendeve të Ballkanit të Hapur, Shqipëri, Serbi e Maqedoni.
Pa dashur të replikojë drejtëpërdrejtë me Kryeministrin Edi Rama, i cili së bashku me homologun Vuçiç promovuan sot disa prej verërave që po ekspozohen në këtë panair, ku nuk merr pjesë Kosova, Haradinaj thotë se verërat kosovare janë shumë hapa përpara atyre të Serbisë, por siç thotë ai, u mungon një promocion i tillë.
Ish kreu i qeverisë së Kosovës ka lëshuar dhe akuza ndaj kryeministrit Kurti, që sipas tij ka “dënuar” me mungesë energjie elektrike panairin e njohur të verërave që zhvillohet në Rahovec “Hardh Fest”.
Postimi i Ramush Haradinaj:
Kosova ka qenë dhe është shumë hapa para Serbisë në prodhim të verërave.
Mbajtja e Panairit të Verërave në Beograd dhe promovimi i tij në rajon, godet direkt biznesin e verarisë në Kosovë.
Përderisa i bëhet kaq promovim panairit në Beograd, panairi në Kosovë dënohet me mungesë rryme, duke pamundësuar funksionimin normal.
Rahoveci është kryeqyteti i verërave në rajon, e që nesër si dhe çdo vit është nikoqir i “Hardh Fest”.
Përkrahja e vreshtarëve tonë promovon punën e tyre dhe Kosovën në gjithë botën.
Panairi, që do të qëndrojë i hapur deri më 4 shtator, do të mirëpresë prodhuesit më të mirë të verës në rajon, por jo vetëm. Në panair do të prezantojnë produktet e tyre edhe kompani europiane dhe botërore, lider në vreshtari dhe prodhimin e verës.
Më shumë se 250 ekspozues nga Shqipëria, Serbia, Maqedonia e Veriut, si dhe nga Mali i Zi, Bosnja dhe Hercegovina, Kroacia, Sllovenia, Hungaria, Italia, Spanja, Franca, Turqia, Argjentina, Kalifornia, Afrika e Jugut, etj, do të jenë pjesë e tij.
Panairi do të zhvillohet çdo vit nga njëri kryeqytet në tjetrin.
a.m/dita
