Pas “imazhit të ri” të PD-së, lidhje dhe hije të rënda familjare që lidhen përsëri me krimin

Nga Orgen Peci

Deklaratat e partive të vjetra politike në Shqipëri për një imazh të ri dhe të hapur ndaj shoqërisë civile, janë fasadë. Në realitet përplasen me të njëjtat praktika të vjetra të mungesës së filtrit dhe meritokracisë.

Rasti më i fundit brenda strukturave drejtuese të Partisë Demokratike – ku përzgjedhja e Juliana Emirit në krye të Këshillit Kombëtar u trumpetua si “fytyra e re” e forcës opozitare.

Por një dokument në media ngre pikëpyetje të mëdha mbi vërtetësinë e këtij procesi rinovimi.

​Ndonëse hapja ndaj elementëve të rinj është jetike për të fituar besimin e elektoratit gri, “vetingu” i brendshëm etik dhe politik është krejt i qartë

Dokumentet zyrtare të bëra publike dëshmojnë se pas këtij imazhi të ri fshihen lidhje dhe hije të rënda familjare që lidhen përsëri me krimin.

Sipas vendimeve të zbardhura të Gjykatave (përfshirë atë të Shkallës së Parë për Krime të Rënda në vitin 2016, lënë në fuqi nga Apeli dhe Gjykata e Lartë, e së fundmi refuzuar nga Gjykata Kushtetuese), babai i drejtueses politike, Kujtim Emiri, ka qenë i dënuar me 12 vite burg (nga të cilat ka vuajtur 8) për vepra të rënda si: Pjesëmarrje në grup të strukturuar kriminal, ndihmë për kalim të paligjshëm të kufijve, falsifikim i pasaportave, vizave dhe dokumenteve shëndetësore.

​Ky fakt dëshmon se klasa e vjetër politike vazhdon të vuajë nga i njëjti sindromë. Kriminalizimi, thithja, tolerimi i personave me të kaluar problematike në rrethin e ndikimit dhe financimit.

I njëjti problem i rëndë është bërë masiv edhe në strukturat qeverisëse dhe në ato të PS.

Dhe janë po këta elementë “të shkathët” që futen në terrenin e protestave qytetare. Ky model shpërfaq përpjekjen e vazhdueshme të politikës së vjetër për të manipuluar dhe “vrarë” zërin e pastër të rinisë dhe shoqërisë civile.

Njësoj siç ndodhi me lëvizjet e mëparshme studentore apo kauzat e mëdha qytetare, ku strukturat e fshehura të këtyre partive infiltruan “rini” për të marrë peng revoltën, edhe në këtë rast shohim të njëjtën skemë. Përdorimi i megafonit të shoqërisë civile nga këta persona me krahët e ngrohtë partiakë zbeh dhe asgjëson idealizmin e të rinjve të vërtetë që kërkojnë ndryshim rrënjësor.

Për sa kohë që forcat politike që qeverisin apo synojnë të qeverisin vendin, nuk zbatojnë kritere rigoroze të integritetit sot, “hapja” e tyre do të mbetet thjesht një fasadë kozmetike. Pa një ndarje të qartë nga të kaluarat kriminale dhe pa ndaluar riciklimin e figurave të sponsorizuara në dëm të meritokracisë, e vjetra do të vazhdojë të mbajë peng të renë në skenën politike shqiptare.

Në foto: Faksimile e vendimit të Gjykatës së Kushtetuese për Kujtim Emirin, babanë e Juliana Emirit botuar nga VoxNews

DITA