Parlamenti i Sllovenisë e njohu zyrtarisht Holodomorin, vdekjen nga uria e miliona ukrainasve nën udhëheqësin sovjetik Josef Stalin në 1932-1933, si gjenocid, në një deklaratë të mbështetur nga shumica e partive politike.
Dy parti të koalicionit paraqitën deklaratën pasi Parlamenti Evropian miratoi një rezolutë vitin e kaluar, duke u bërë thirrje vendeve dhe organizatave ndërkombëtare të njohin Holodomorin si gjenocid.
Deklarata mori mbështetje ndërpartiake, pasi të gjitha partitë, përveç të Majtës, një partner i vogël në koalicion, votuan pro të martën.
“Holodomori është një fakt. Por historianët nuk kanë arritur një vendim unanim për arsyet e ngjarjes. Të etiketosh Holodomorin si gjenocid, të bësh paralele mes Rusisë së sotme dhe Bashkimit Sovjetik të Stalinit, është e papërgjegjshme”, tha deputeti i së majtës Matej T. Vatovec.
Ky nuk ishte mendimi i partive të tjera, të cilat argumentuan se me miratimin e deklaratës, Asambleja Kombëtare po shprehte solidaritetin e saj me kombin ukrainas dhe do të ndihmonte në informimin e publikut të gjerë për krimin.
Edhe qeveria e mbështeti deklaratën.
“Qeveria i bashkohet dënimit të një tragjedie që shkaktoi vuajtjet dhe vdekjet e miliona ukrainasve dhe banorëve të republikave të tjera sovjetike”, tha Sekretari i Shtetit i Ministrisë së Jashtme, Samuel Žbogar.
Ai paralajmëroi se Rusia vazhdon të grabisë rezervat e grurit të Ukrainës dhe të pengojë eksportet e grurit në vendet që kanë nevojë për të.
Ndërkohë, Dejan Kaloh i Demokratëve të krahut të djathtë, partia kryesore opozitare, bëri thirrje që komuniteti ndërkombëtar të rrisë ndërgjegjësimin për gjenocidin dhe mizoritë e tjera të kryera nga regjimi sovjetik.
Presidenti ukrainas Volodymyr Zelenskyy e përshëndeti hapin në Twitter.
“Unë u jam mirënjohës parlamentarëve sllovenë për miratimin e deklaratës që nderon kujtimin e miliona viktimave ukrainase të gjenocidit të Holodomor-it në Ukrainë në vitet 1932-1933”, shkroi ai në Twitter të martën.
j.l./ dita
