Partia Demokratike ka mbledhur këtë të shtunë në orën 10:00 Kuvendin Kombëtar, në të cilin vendoset për disa çështje që ndikojnë në të ardhmen e kësaj partie për 3 vitet e ardhshme.
Këto ndryshime u miratuan nga Kryesia e PD-së 3 ditë më parë ndërsa Kuvendi do të të zgjedhë edhe Këshillin e ri Kombëtar, duke i hapur rrugën edhe ndryshimeve të tjera në kupolën e partisë.
Ky Kuvend u quajt si Kuvendi i ripërtëritjes së partisë dhe një qasje e tillë erdhi gati 4 vite pas Kuvendit të famshëm të Rithemelimit që Berisha thirri më 11 dhjetor 2021.
Punimet e Komisionit u drejtuan nga Ivi Kaso, ndërkohë që ndryshimet në statut u prezantuan nga Gazment Bardhi. Sakaq, ndryshimet në riorganizimin e diasporës dhe digjitalizimin e partisë u prezantuan nga Nikola Kedhi dhe Grigels Muçollari.
Ndërkohë, mësohet se fjala hapëse iu besua të resë që vjen nga diaspora, Erisa Bajaziti. Punimet e Kuvendit më pas vijuan me fjalën e Berishës dhe procesin e votimit për anëtarët e rinj të Këshillit Kombëtar.
Burimet për gazetarin Ardit Hoxha bënë të ditur se 1100 delegatët e Kuvendit Kombëtar të PD-së, që morën pjesë në atë ditë, përcaktuan 200 anëtarët e rinj të zgjedhur të Këshillit Kombëtar.
Përveç 200 anëtarëve të Këshillit Kombëtar që u zgjodhën me votë nga Kuvendi, atyre iu bashkuan edhe anëtarë të tjerë që ishin deputetë, ish-zyrtarë të PD-së, si dhe drejtues bashkish, përfaqësues të PD-së dhe anëtarë të kryesisë.
j.l./ dita
