Parlamenti Europian u hoqi imunitetin dy deputetëve të përfshirë në aferën korruptive “Qatargate” që tronditi institucionet europiane në fund të vitit të kaluar.
Italiani Andrea Kocolino dhe belgu Mart Tarabella iu bashkuan eurodeputetëve të tjerë që votuan në mënyrë unanime për heqjen e imunitetit edhe pse mohuan çdo akuzë për veprime të jashtëligjshme.
Socialdemokrati belg u tha gazetarëve se votoi “Pro” heqjes së imunitetit të tij, pasi dëshironte të fliste pa pengesa me hetuesit.
Deri më tani, numri i deputetëve nën hetim për këtë çështje ka arritur në 6.
Hetuesit belgë dyshojnë se eurodeputeti tjetër italian Antonio Panceri qëndronte në krye të rrjetit të eurodeputetëve që mendohet të kenë marrë në total 1.5 milionë Euro ryshfet nga zyrtarët e Katarit, për të lobuar pro vendit të vogël të Gjirit Persik, të kritikuar ashpër për shkelje të të drejtave të njeriut me pasojë vdekjen e mijëra punëtorëve vendas dhe të huaj që morën pjesë në ndërtimin e infrastrukturës së botërorit të futbollit 2022.
