Në sallën e GJKKO, përballë trupës gjykuese, Safet Gjici ka deklaruar se nuk ka shkelur ligjin. Ish-kreu i Badhkisë Kukës tha se nuk ka pasur një projekt konkret të vënë në zbatim.
Sipas tij, e gjitha ka qenë një kurth nga rivalët e tij politikë.
“Unë u ndëshkova për veprimin që kam bërë, unë e mora dënimin për gabimin që kam bërë. Nuk ka projekt, nuk kemi parë projekt, nuk kam shkelur ligjin. Rashë në kurthin e atyre që s’më duan, por nuk kam kryer asnjë shkelje ligjore”, ka thënë Gjici.
Avokati Përparim Kulluri kërkoi një masë më të butë sigurie duke thënë se nuk ka elementë të veprës penale të “korrupsionit” në veprimet e kryera nga Gjici.
Ditën e sotme, Gjykata e Posaçme Kundër Korrupsionit dhe Krimit të Organizuar ka konfirmuar masën e sigurisë “arrest me burg” për Safet Gjicin, ish-kryetarin e Bashkisë Kukës të akuzuar për korrupsion pasiv.
Gjithashtu gjykata vendosi të lërë në arrest shtëpie Alma Kaçi, vajzën e cila shfaqet në video me Gjicin.
Para togave të zeza ajo ka konfirmuar se ka filmuar të gjithë aktin me Safet Gjicin në zyrën e tij.
Sipas saj ka pasur një projekt konkret për kujdesin ndaj qenve të rrugës, por kur ka shkuar për t’ia propozuar në zyrë Gjicit, ai e ka ngacmuar seksualisht. Për rrjedhojë, kur ka zhvilluar takimin e dytë, ajo ka vendosur që të filmojë gjithçka.
“Unë kisha një projekt për kujdesin ndaj qenve të rrugës. Për këtë kam folur edhe me Gjicin. Kur shkova herën e parë ai më ngacmoi seksualisht. Në takim e dytë marrëdhënien e kam kryer me dëshirë, por vendosa ta filmoj”, thotë gruaja 40 vjeçare.
o.j. / dita
