Përgjimet dhe akuzat për tregti armësh, reagon kompania: Ron Yeffet nuk na përfaqëson, përgjimi ishte i paautorizuar

Shoqëria DEL-CNG SHPK ka reaguar pas publikimit të një audiomateriali të publikuar nga ish-zëvendëskryeministri Arben Ahmetaj, duke e cilësuar atë si rezultat të një përgjimi të paautorizuar në ambientet private të kompanisë. Në një deklaratë zyrtare, shoqëria thekson se administratori, punonjësit dhe bashkëpunëtorët e saj nuk kanë pasur dijeni dhe nuk kanë dhënë pëlqim për incizimin apo transmetimin e materialit.

DEL-CNG sqaron gjithashtu se Ron Yeffet nuk është përfaqësues, punonjës, ortak apo administrator i kompanisë dhe se nuk ka autorizim të veprojë apo të marrë angazhime në emër të saj. Shoqëria deklaron se nuk ka marrëdhënie biznesi me të dhe se takimi me të nuk përbën miratim të qëndrimeve të shprehura prej tij.

DEL-CNG thekson se dëgjimi i një propozimi apo bërja e pyetjeve gjatë një takimi privat nuk përbën miratim apo përfshirje në veprimtari të paligjshme. Shoqëria deklaron gjithashtu se nuk ekziston ndonjë masë urgjente nga autoritetet shqiptare, si sekuestrim, marrje asetesh apo vendim gjyqësor ndaj saj.

Në reagim, kompania kundërshton edhe publikimin e zërave, emrave dhe imazheve të punonjësve e bashkëpunëtorëve pa pëlqim, duke argumentuar se kjo cenon jetën private, sigurinë dhe dinjitetin e tyre. Në përfundim, DEL-CNG kërkon ndërprerjen e publikimit të materialeve, anonimizimin e plotë të punonjësve dhe bashkëpunëtorëve dhe publikimin e qëndrimit të saj, duke theksuar se liria e medias respektohet, por nuk duhet të shoqërohet me përdorimin e përgjimeve të paligjshme apo nxjerrjen e bisedave jashtë kontekstit.

“Audiomateriali është marrë përmes një përgjimi të paautorizuar në ambientet private të Shoqërisë, duke përbërë ndërhyrje të padrejtë në jetën private apo sekretet tregtare. DEL-CNG SHPK, administratori, punonjësit e saj dhe bashkëpunëtorët e shoqërisë, NUK kanë pasur dijeni dhe NUK kanë dhënë pëlqim për incizimin apo transmetimin, duke shkelur hapur Kushtetutën, Kodin Penal dhe Ligjin nr. 124/2024 ‘Për mbrojtjen e të dhënave personale. Z. Ron Yeffet NUK është përfaqësues, punonjës, ortak apo administrator i DEL-CNG SHPK dhe nuk ka asnjë autorizim të veprojë apo marrë angazhime në emrin e shoqërisë. Shoqëria nuk ka marrëdhënie biznesi me të dhe prania e tij në takim nuk përbën për shoqërinë miratim të qëndrimeve të tij. Hedhim poshtë çdo aludim spekulativ për skema kriminale, përfitimi të paligjshme, apo marrje të paligjshme asetesh. Sqarojmë se përfaqësuesit tanë kanë këmbëngulur qartë se çdo propozim-procedurë, duhej të ndiqej ekskluzivisht në rrugë të ligjshme. Dëgjimi i një propozimi apo bërja e pyetjeve në një takim privat nuk përbën miratim apo përfshirje në veprimtari të paligjshme. Theksojmë se nuk ekziston asnjë masë me karakter urgjënt nga ana e autoriteteve ligjzbatuese shqiptare si sekuestrim, marrje asetesh apo vendim gjyqësor ndaj nesh. Publikimi i zërave, emrave dhe imazheve të punonjësve-bashkëpunëtorëve tanë pa pëlqim, cenon, jetën private, sigurinë dhe dinjitetin e tyre. Liria e medias respektohet, por ajo nuk autorizon përdorimin e përgjimeve të paligjshme apo nxjerrjen e bisedave jashtë kontekstit, duke sjellë një dëm në shumë drejtime. Kërkojmë ndërprerjen e menjëhershme të publikimit, anonimizimin e plotë të punonjësve dhe bashkëpunëtorëve tanë dhe botimin e këtij qëndrimi të qartë në interes të së vërtetës”, thuhet në letrën drejtuar mediave.

j.l./ dita