Rumunët sot shkojnë në votime për përsëritjen e zgjedhjeve presidenciale të vitit të kaluar, pesë muaj pasi ato u anuluan për shkak të parregullsive.
Sipas sondazheve, favorit për të fituar është George Simion, kandidati i ekstremit të djathtë nga Aleanca për Bashkimin e Rumunëve (AUR), por asnjëri nga 11 kandidatët nuk pritet të sigurojë shumicën absolute në raundin e parë.
Kjo do të thotë se, shumë gjasë, do të nevojitet një raund i dytë, i planifikuar për më 18 maj, mes dy kandidatëve me më shumë vota.
Qendrat e votimit janë hapur në orën 06:00 dhe do të mbyllen në orën 20:00.
Në zgjedhjet e mbajtura në nëntor, në raundin e parë doli fitues kandidati i ekstremit të djathtë me retorikë pro-ruse, Călin Georgescu, i cili zhvilloi një fushatë kryesisht përmes TikTok-ut.
Megjithatë, pak para raundit të dytë, Gjykata Kushtetuese anuloi rezultatin e raundit të parë për shkak të parregullsive në financimin e fushatës. Georgescu u ndalua të rikandidonte dhe prokuroria nisi në shkurt një hetim ndaj tij për deklarime të rreme në lidhje me financimet e fushatës.
Nuk është ende e qartë se cili nga kandidatët e tjerë do të zërë vendin e dytë në votimin e sotëm. Kandidatë të mundshëm janë kryetari konservator-liberal i Bashkisë së Bukureshtit, Nicușor Dan nga Partia Kombëtare Liberale (PNL), si dhe ish-kryeministri socialdemokrat Victor Ponta.
Favoriti, Simion, ka deklaruar se një nga prioritetet e tij, nëse zgjidhet, do të jetë të sigurojë “drejtësi” për Georgescu. Ai nuk e ka përjashtuar mundësinë që ta emërojë atë si kryeministër.
Në Rumani, është presidenti ai që merr vendimet për politikën e jashtme dhe sigurinë kombëtare.
j.l./ dita
