Nga Orgen Peci
Gjykata e Posaçme ka vendosur dy masa sigurie për Zëvendës-Kryeministren dhe Ministren e Infrastrukturës, Belinda Balluku, duke pezulluar ushtrimin e detyrës dhe ndaluar daljen jashtë vendit.
Vendimi është marrë nga gjyqtari Erion Çela, pas kërkesës së prokurorit Dritan Prençi, në kuadër të hetimeve për shkelje të barazisë në tendera publike.
Kjo lëvizje e drejtësisë, që prek një prej zyrtarëve më të lartë të ekzekutivit, shënon një moment të rëndësishëm në kontrollin e përgjegjësisë së funksionarëve publikë në proceset e prokurimeve.
Pezullimi nga detyra ka për qëllim të pengojë çdo ndikim të mundshëm mbi procedurat në vazhdim, ndërsa ndalimi i daljes jashtë vendit synon të sigurojë që ajo nuk do arratiset si paraardhësi i saj Ahmetaj.
Ky zhvillim nuk ka ardhur papritur. Pak ditë më parë, Dita kishte paralajmëruar mundësinë e marrjes së masave të tilla, duke evidentuar ritmin e hetimeve dhe indiciet që ishin mbledhur nga prokuroria. Tashmë ky hap i ri pritet të ketë pasojë të dyfishtë.
Nga njëra anë, ai forcon besimin se drejtësia po vepron pa paragjykime me funksionarët e lartë.
Nga ana tjetër, ka impakt të menjëhershëm politik, duke krijuar një boshllëk në rolin e saj si ministre që drejton dikastere kyç me buxhete gjigante. Kjo do ta shtojë presionin mbi Ramën për të menaxhuar situatën pa ndikime në projektet infrastrukturore. Menaxhimi i tyre do kërkojë urgjentisht zëvendësim ose riorganizim të detyrave.
Po çfarë pritet të ndodhë më tej? Prokuroria do të vazhdojë mbledhjen e provave për shkeljet në tendera, ndërsa Balluku do të jetë e pranishme për të dhënë shpjegime. Në fazat e ardhshme, nuk përjashtohet që gjykata të vendosë për masa sigurimi të tjera, në varësi të zhvillimeve.
Për momentin akuzat ndaj Ballukut lidhen me shkelje të barazisë në tendera, një çështje që ka qenë objekt shqyrtimi dhe debatesh të vazhdueshme në publik dhe media.
Vendimi i Gjykatës së Posaçme përputhet me praktikat ndërkombëtare për funksionarët publikë nën hetim, ku masa sigurie dhe pezullimi nga detyra përdoren për të garantuar integritetin e hetimeve dhe shmangur çdo interferencë në proces.
Në vijim, do të jetë vendimtare të shihet se si do të ecë procesi gjyqësor, si do të reagojë qeveria ndaj boshllëkut të krijuar dhe cilat do të jenë pasojat afatgjata për menaxhimin e tenderave publikë në Shqipëri.
—
©️Copyright Gazeta DITA
Ky artikull është ekskluziv i Gazetës DITA, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar DITA dhe në fund të vendoset linku i burimit, sipas Nenit 178 të Ligjit Nr/ 35/2016
O orgen
Po mire more djale po ju ku i merrni vesh para vet te interesuarve gjera te tilla???
A ka ligj per sekrete hetimore aty ne Shqiperi apo ha muco pi muco??
Une se marr vesh ket pune
E de e ben vet Rama dhe postin e ksaj sic po ben te Veliajt
Kjo bibe i ka shkaktuar taksapaguesit vec shume te tjerave edhe 8 Milione Euro deme te deklaruara dje nga kontrolli i shtetit, vetem brenda nje viti per pagesen e punonjesve te pushuar pa te drejte ne ministrine qe kjo drejton. I ka zevendesuar me njerez te besuar dhe demi i shkaktuar paguhet nga ne te gjithe. Dhe fyelli ben sehir, e mer biles edhe ne mbrojtje. Ju lutem gazetareve, jane te vetmit qe mund ta shpetojne kete vend, te bejne detyren dhe te kerkojne llogari te perditshme per keto vjedhje qe behen. Perdite te kerkoni llogari ne emrin tone. Shteti jemi ne, por nuk behemi dot bashke per t’ju treguar vendin ketyre hajduteve.