Shqiptarët janë konsumues jo të paktë të pijeve alkoolike dhe numri më i madh i atyre që konsumojnë alkool i përkasin moshës nga 25-34 vjeç.
Kjo është ajo çfarë vërehet në dokumentin politik të strategjisë për parandalimin dhe zvogëlimin e dëmeve të lidhura me alkoolin në Shqipëri.
Sipas të dhënave nga anketimi për përdorimin e substancave në vend, edhe grupmosha nga 15-24 vjeç përbën një pjesë të konsiderueshme të atyre që konsumojnë alkool.
Në studim u konstatua se grup-mosha 15-64 vjeç përbënte 69.8% të atyre që konsumojnë alkool, grup-mosha 15-34 vjeç përbënte 68.7%, ndërsa përqindjen më të madhe, 76.8%, e përbënte grup-mosha 25-34 vjeç.
Më tej studimi raporton se varësisht rezidencës, prevalenca e përdorimit të alkoolit gjatë jetës, në zonat urbane është 73.5%, dhe në ato rurale 65.8%, ndërsa prevalence vitin e fundit është përkatësisht 64.4% dhe 57.9%. (shiko tabelat 4 dhe 5).
Birra, pija e preferuar e adoleshentëve
Lidhur me konsumin e pijeve alkoolike te adoleshentët studimi nënvizon se në një masë të konsiderueshme diçka e tillë fillon që në moshën 11 vjeçare. Përsa i përket llojit të pijes alkoolike të konsumuar nga nxënësit e grup-moshës 11-15 vjeç rezulton se pjesa më e madhe e tyre (5.3 %) konsumojnë birrë, 4.5 % verë dhe 2.4 % konsumon superalkoolikë.
Varësia nga alkooli në Shqipëri përllogaritet të jetë në nivelin rreth 3.4 për qind, ku konsumuesit më të mëdhenj janë meshkujt.
Alkooli dhe përdorimi i dëmshëm i tij shpesh është shkaktar për probleme sociale dhe ato shëndetësore, ndërkohë që llogaritet se shqiptarët konsumojnë rreth 7 litra për person.