Piramida e së keqes

Nga Bedri Islami

Botuar në DITA

Në ditën e djeshme, në njërën nga konferencat e zakonshme të shtypit nga ballkoni i hapur, ish kryeministri Berisha kërcënoi gazetarët dhe mediat që publikojnë detaje nga akuza e prej 500 faqeve e tij për korrupsion, e cila i është bërë e njohur nga SPAK.

Është në rastet e pakta kur një ish shef qeverie kapet me lajmësit, po aq sa është kapur edhe me ngritësit e akuzës së tij.

Zakonisht ai, ose njerëz pranë tij, janë marrë me gjithçka veç vetes, kanë ngritur akuza dhe kanë bërë publike dosje që nuk i njihte askush, kanë pasur në shërbimin e tyre tufë prokurorësh dhe gjykatësish, drejtorë policie dhe të shërbimit informativ, kanë bërë publike gjithë farë informacionesh nga “ qytetari digjital”, pa verifikuar asgjë, kanë ngritur vetë “ qytetarë të tillë”, dhe, megjithëse ajo çfarë është e shkruar në padinë kundër tij nuk është më as e fshehtë, as temë tabu, ai synon që disa nga gazetarët t’i trajtojë si kriminelë dhe të dënojë si të tillë.

Berisha është njeri që e njeh mirë botën e mediave, e ka përdorur dhe e përdorur më mirë nga gjithë ata që janë në opozitë, por thelbi i asaj që e trazon nuk është përhapja e faktit, gjë që tani, në kushtet e botës së madhe sociale është e pamundur, por e vërteta se, përmes këtyre faqeve po shembet ajo që ka ngritur, perandoria e së keqes.

Kjo e trazon atë më shumë se gjithçka. Njeriu që e ka quajtur njërën nga gazetat më të mëdha në botë, si letër higjienike, pa as më të voglin dyshim nuk e çan kokën për mediat që bëjnë publike një gjë të njohur. Nëse këto të dhëna, si për shembull , transaksionet prej miliona uro për të blerë prona në perëndim, do të kishin dalë para akt padisë, tashmë publike, atëherë bubullimat dhe gjëmimet e tij do të ishin të ububushme.

Atë e tremb vetëm fakti që e ndjen para të gjithëve: perandoria e tij po shembet.

Për të gjithë ata që në vite kanë besuar se, të paktën, njëri nga familja Berisha, do të ishte i ndershëm, jam i bindur se do të ketë një deziluzion të ndjeshëm, dhe, për perceptimin e tyre, të pa besuar. Në fakt, ajo që e ngriti në pushtet 32 vite më parë dhe e mbajti gjatë te militantët e tij, legjenda se, në mos tjetër, Sali Berisha është një njeri i ndershëm, pikërisht ajo e rrëzoi.

Miti i krijuar nga një grup njerëzish rreth tij, që në krye të herës, se njeriu i bluzave të bardha, ashtu edhe e kishte ndërtuar jetën e tij, është shembur prej kohe për kundërshtarët e tij, por, tashmë, ai ka nisur të bjerë nga themelet edhe për ato që ai i ka quajtur garda e sigurte e tij apo rreth tij.

Është në rastet më tipike të shteteve diktatoriale apo post diktaturë kur krijohet një familje piramidë, e lidhur me të keqen, ku aurorën e kreut të familjes, megjithëse e pa merituar, e heqin veset e fëmijëve, dëshira e tyre e përbindshëm për të krijuar pasuri përrallash përmes pushtetit të babait të tyre, dhe, mbi të gjitha, për ta quajtur veten dhe trajtuar si padronë të shtetit.

Ata e kanë konceptuar shtetin si një makineri të madhe, që e vënë në lëvizje duhet të jetë shërbyese e tyre dhe ku, pa asnjë dyshim, duhet të vërviten të gjithë, që nga njerëzit e lartë të pushtetit, ministra, deputetë, zyrtarë të rëndësishëm, deri tek ato që kanë bërë punën e shegertit, hamallit, denoncuesit për të pa bindurit.

Shkalla e nënshtrimit ishte e kudo ndodhur, që nga kreu i shtetit, ku shtriheshin testikulit e e njohur të përuljes, deri në ministra që ndryshonin ligjet sipas dëshirës së të plot fuqishmit të tyre, dhe, si të mos mjaftonte kjo, edhe në nënshtrimin ndaj urdhrit të  bijve e bijave  të zotit kryeministër.  

Dosja e denoncimit, hetimit dhe tani ndaj të pandehurve të familjes Berisha dhe rreth tyre, megjithëse është tepër voluminoze, disi e papritur, si duket hetimi ka qenë i shtrirë jo vetëm brenda kornizës së një Gjykate, për shfaq atë që është ditur, që dihet, që ka ndodhur, që ndodh, që është e pranishme, krijimin e një piramide që ka rritur të keqen, e ka bërë të plot fuqishme, e mbi të gjitha, një dorë njerëzish kanë qenë të kënaqur që kanë nënshtruar shtetin.

Kjo i ka kushtuar rëndë, tepër rëndë gjithë vendit, pasi vetë perceptimi i shtetit si malli i të atit, apo nënshtrimi i shtetit nga pinjollët e sëmurë nga vesi i mashtrimit, ka sjellë disa mijëra të vrarë, të humbur, të zhdukur, të sakatuar dhe, vetë rënien e shkatërrimin e shtetit.

Nëse kjo piramidë e së keqes nuk do të ishte ngritur, atëherë me siguri nuk do të kishte ndodhur as tragjedia e Gërdecit, me të cilën tallen sot në gjykatat e vendit dhe drejtësia është kapur në fajtorë të dorës së tretë, pasi nuk ia mban ende të kapë thelbin e asaj që ndodhi; nuk do të kishte pasur katër të vrarë dhe dhjetëra të vrarë në 21 janar, nuk do të kishim ende sot një tufë njerëzish të nënshtruar, edhe pse i quajnë ministra, deputetë, kryetar grupi, sekretarë.

Piramida e së keqes ka kapur shtetin prej kohe. Për të pasuruar familjen e tij shefi i qeverisë së kohës , pa asnjë të keq, ndryshon ligjet brenda pak muajve, për të ndërtuar një sistem ku zhvatja nga dhëndri të jetë e ligjshme, sipas tij. Shkarkon ushtarakë të lartë, të cilët nuk i binden për të shkelur ligjin, dhe në vend të tyre dërgon njerëz me dinjitet dhe me komplekse nënshtrimi në sferat e larta të ushtrisë, shërbimit informativ; thërret në ndihmë ministra të sakatuar nga shpirti, por që janë në të vërtetë oligarkët e vërtetë të këtij vendi.

Është e pa shembull pasuria që ka vënë familja Malltezi, pjesë e familjes Berisha. Në të vërtetë, truri i familjes Berisha. Pasuritë e mëdha që kanë krijuar i bëjnë ato në familjet e pasura të këtij vendi, por edhe në ato më mafiozet.

Struktura që kanë ngritur është e pa turp, e pa cipë, e hapur, harbute dhe mizore. Ata bashkëpunojnë me figura të botës së errët të krimit, të lidhur me nëntokën më agresive të botës politike dhe të shërbimit të fshehtë serb; blejnë aty ku e dinë se do të jetë vendimi i nesërm i qeverisë, dhe blejnë për një grusht lekë, për ta shitur pas pak kohe me çmime të stër rritura, edhe blerësi është nipi i shefit të shërbimit të fshehtë serb, Stanishiq, një kriminel lufte, njeriu më i afërt i Millosheviçit.  Ata zhvatin kushërinjtë e tyre, i rrjepin, duke përfituar nga pushteti i babait, krijojnë lidhjen e duhur për të gjetur kudo burime, bënë gjoba, qoftë në formë direkt, dhe djali i familjes njihet si njeriu me shenjë – me çantë në dorë , bija kërkon deri në 3 milion euro për një firmë të babait të saj, studio e tyre ligjore shndërrohet në një vend ideal për pastrimin e parave, miliona euro lëvizin në duar, deri sa në fund shfaqet edhe një njeri i panjohur, që, në një ditë tërheq miliona euro në aferën CEZ DIA.

Dy familja janë njohur për krijimin , në herë të parë, të familjeve piramidë të së keqes, Mirko – biri famëkeq i Millosheviçit, dhe, shumë vite më parë, pinjolli i Çausheskut. Përsëritja e tyre në Shqipëri, për fat të keq jo vetëm në familjen Berisha, është vazhdë e mendësisë së përuljes së shtetit përballë forcës së familjes., nënshtrimi i institucioneve përballë Njëshit, çka ndodh  edhe sot.

Dhjetëra, ndoshta qindra njerëz i janë nënshtruar me vetëdije të plotë sundimit të piramidës së të keqes. Në fakt ata janë pjesë. Ministra të rëndësishëm, si Ruli, Bode, Aldo Bumçi, Alibeaj, Basha, Pango, janë nënshtruar me zell, qoftë për të ruajtur vendin e tyre, por, më shumë, për të qenë pjesë e kësaj oligarkie të krijuar vetëm si pjesë e politikës.

Këto njerëz, e të tjerë si këto, edhe në qeveritë e fundit, e ndjejnë veten komod, pasi askush nuk heton në pasuritë e tyre, nuk ndjek vendimet që kanë marrë, përgjegjësitë që kanë shkelur. Ata ishin e vazhdojnë të jenë e keqja më e madhe e vendit, që nuk shkulet vetëm nga media, nga një tufë hetuesish e prokurorë, sepse rrënjët e ngritura prej tyre janë thellësisht të ngulura.

©Copyright Gazeta DITA

Ky artikull është ekskluziv i Gazetës DITA, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar DITA dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016