Një 19-vjeçar turk, i shpallur në kërkim ndërkombëtar nga Interpol Tirana për tentativë vrasje dhe armëmbajtje pa leje është arrestuar në Greqi. I riu dyshohet se është autor i plagosjes me armë zjarri të shtetasit turk Halil Uçar, 36 vjeç, ngjarje e ndodhur më 9 mars të këtij viti në një lokal në zonën e Saukut, në Tiranë.
Si ndodhi plagosja në Sauk
19-vjeçari dhe 36-vjeçari ndodheshin në tavolina të ndryshme dhe në kate të ndryshme të lokalit. Pasi kishte përfunduar darkën në katin e parë, i riu është ngjitur në katin e dytë, ku dyshohet se ka qëlluar me armë zjarri në drejtim të Halil Uçarit, duke e plagosur me një plumb në shpatull. Pas të shtënave, ai është larguar me shpejtësi nga vendi i ngjarjes.
Më pas, 19-vjeçari është arrestuar gjatë një kontrolli policor në aksin rrugor Kalamata-Pylos, në Greqi, së bashku me dy shtetas të tjerë turq, të moshës 21 dhe 22 vjeç. Gjatë kontrollit të automjetit me të cilin udhëtonin, policia greke gjeti dhe sekuestroi 14.7 gramë marijuanë dhe një sasi të vogël kokaine, të cilat dyshohet se zotëroheshin nga të tre personat.
Ndërkohë, 19-vjeçari dhe 22-vjeçari paraqitën dokumente me autenticitet të dyshimtë. Dokumentet u sekuestruan, ndërsa verifikimet zbuluan se të dy qëndronin në mënyrë të paligjshme në territorin grek. Gjatë operacionit, autoritetet sekuestruan gjithashtu katër telefona celularë, si dhe karta identiteti dhe leje drejtimi të lëshuara nga autoritetet bullgare.
Gjatë verifikimit të të dhënave, autoritetet greke konstatuan se 19-vjeçari ishte shpallur në kërkim ndërkombëtar përmes një Njoftimi të Kuq të Interpolit, të lëshuar me kërkesë të autoriteteve shqiptare. I riu kërkohej për veprat penale që lidhen me tentativën e vrasjes dhe mbajtjen e përdorimin e paligjshëm të armëve të zjarrit. Për arrestimin dhe rrethanat e ngjarjes po vijojnë hetimet nga autoritetet greke, ndërsa pritet të ndiqen procedurat ligjore përkatëse lidhur me kërkimin ndërkombëtar të 19-vjeçarit.
j.l./ dita
