Policia e Kurbinit arrestoi 17-vjeçarin i cili mesditën e kësaj të hëne plagosi me armë zjarri një 15-vjeçar. Në një njoftim për mediat, policia thotë se adoleshenti u gjet në një banesë të braktisur.
Plagosja ndodhi rreth orës 12:20, jashtë gjimnazit në lagjen nr.4 të Laçit.
Ngjarja dyshohet se erdhi pas një konflikti të çastit për motive të dobëta mes dy adoleshentëve, të cilët janë nxënës të këtij gjimnazi. 15-vjeçari mbeti i plagosur në këmbë dhe u dërgua në spital jashtë rrezikut për jetën.
“Rreth orës 12:20, në lagjen nr.4, Laç, jashtë rrethimit të gjimnazit, dyshohet se pas një konflikti të çastit për motive të dobëta, shtetasi A. Gj. 17 vjeç, ka plagosur me armë zjarri në këmbë shtetasin L. Rr. 15 vjeç, të dy nxënës në gjimnaz dhe banues në Kurbin. I plagosuri është transportuar në spital për ndihmën e nevojshme mjekësore, ku ndodhet jashtë rrezikut për jetën, ndërsa autori është larguar menjëherë pas ngjarjes. Falë veprimeve të shpejta hetimore dhe kontrolleve të pandërprera nga shërbimet policore, është bërë e mundur lokalizimi në një banesë të braktisur dhe kapja e autorit të dyshuar të plagosjes, shtetasit A. Gj. Grupi hetimor nën drejtimin e Prokurorisë së Rrethit Gjyqësor Kurbin, vijon hetimet për zbardhjen e plotë të rrethanave të ngjarjes” , tha policia në një njoftim për mediat.
o.j/dita
