Një grua mbeti e plagosur me armë zjarri pasditen e kësaj të enjteje në fshatin Garunjas të Lushnjes. Ajo është Bajame Senej, 60-vjeçe. Gruaja u dërgua në spitalin e Lushnjes dhe është jashtë rrezikut për jetën. Autoritetet policore kanë mundur të identifikojnë autorin e dyshuar të ngjarjes dhe aktualisht po punojnë për kapjen e tij. Sa i përket motiveve, dyshohet se shkak është hakmarrja.
Plagosja e gruas dyshohet se vjen si pasojë e një sherri të nisur 2 vite më parë, mes dy fiseve Hasalla. E plagosura këtë të enjte është motra e Kastriot Hasallës, i cili akuzohet për vrasjen e kushëririt të tij Romeo Hasalla më 29 Korrik të 2021-shit.
Bëhet fjalë për një sherr të fiseve Hasalla të nisur 2 vite me parë, për një tokë bujqësore prej 2 hektarësh. Ditën e sotme për këtë ngjarje, gjykata e Lushnjes dha dënimin me 35 vjet burg për Kastriotin.
Sefa thotë se familjes Hasalla iu bë atentat, teksa po ktheheshin për në shtëpi me makinë. Vetë vëllai i të plagosurës Afrim Hasalla, në një prononcim për gazetaren tregoi gjithë dinamikën e ngjarjes.
Ai tha se motra Bajame Senej ishte në automjet me të birin. Ndërsa vetë ai udhëtonte me një tjetër mjet, bashkë me avokatin. Palët ktheheshin nga gjyqi, kur iu bë pritë. Vetë Afrim Hasalla akuzoi se pas atentatit është familja e Shaip Hasallës, babai Romeo Hasalla, të vrarë nga Kastriot Hasalla dy vjet më parë.
Afrim Hasalla tregon më tej se pasi dëgjuan të shtënat, zbritën nga automjeti dhe panë që 60-vjeçarja ishte plagosur në këmbë.
Afrim Hasalla: Nuk i ka marrë asnjë masat. Shaip Hasalla me djemtë. Urdhëroni. Para dy vjetëve na kanë qëlluar me armë, sot qëlluan prapë me armë. Më kanë plagosur motrën.
Pyetje: Pse qëlluan sot?
Afrim Hasalla: Atë e di shteti që nuk kanë marrë masat. U kemi çuar fotot. Urdhëro.
Pyetje: Ishit në gjyq sot?
Afrim Hasalla: Po ishim në gjyq.
Pyetje: Për çfarë çështje?
Afrim Hasalla: Për këtë çështje. Për punë toke, Kastrioti isha dhe unë bashkë aty. Mbaruam gjyqin u nisëm për shtëpi, na bënë pritë me armë.
Pyetje: Sa vetë ishin?
Afrim Hasalla: Nuk i pamë. Isha bashkë me avokatin nga Tirana.
Pyetje: Për çfarë ishte bërë gjyqi sot?
Afrim Hasalla: Për këtë çështje që është këtu përpara.
Pyetje: Pas gjyqit ndodhi?
Afrim Hasalla: Po, pas gjyqit.
Pyetje: Sa veta ishit në makinë?
Afrim Hasalla: Unë isha me avokatin. Nipi mbrapa ishte me motrën.
Pyetje: Kush makinë u qëllua?
Afrim Hasalla: Nipi, mbrapa. Ishte me motrën, unë isha me furgon para. Dëgjuam të shtënat e armëve. I thashë avokat ore po më qëllojnë nipin më duket. Kthej kokën mbrapa, nipi me shpejtësi. Ul xhamin dhe më thotë po më qëllojnë.
Pyetje: Vazhdon të jetë sherri për tokën?
Afrim Hasalla: Për këtë çështje është, për tokën.
Pyetje: Sa sipërfaqe është?
Afrim Hasalla: 2 hektarë tokë që kam kaq vite me një stallë që kam bërë atje dhe sot ky zotëria do të vijë ta marrë me forcë.
Pyetje: Kush është dënuar për vrasjen e dy viteve më parë.
Afrim Hasalla: Kastrioti është. Por Kastrioti nuk e vrau. E vrau Shaipi djalin. Kastrioti mbrojti vëllanë dhe fëmijën e tij. Urdhëroni personin që na priti atje me armë. Këtu është Shaip Hasalla.
